Presidenti i Republikës së Shqipërisë, Ilir Meta, ishte i pranishëm në homazhet në nderim të Liri Belishovës, komunistes së orëve të para, e cila do të vuante nga vetë regjimi që ngriti 36 vjet dënime dhe internime.
Në një status në Facebook, Meta shkruan se “dhimbja është edhe më e madhe, kur reflektojmë jo vetëm për zhgënjimin e këtij brezi idealist pas Luftës, por edhe për persekutimin ç’njerëzor dhe vuajtjet e patreguara që përjetuan shumë prej tyre!”
Me dhimbje të thellë nderova sot, një nga emblemat kryesore të rinisë antifashiste Liri Belishovën, e cila u nda nga jeta dy ditë më parë. Edhe njëherë mirënjohje pafund për një nga partizanet më të reja të LANÇ, vajzë e një familje të shquar patriotike të Mallakastrës, me kontribute të spikatura për pavarësinë e Shqipërisë dhe shtetit shqiptar. Dhimbja është edhe më e madhe, kur reflektojmë jo vetëm për zhgënjimin e këtij brezi idealist pas Luftës, por edhe për persekutimin ç’njerëzor dhe vuajtjet e patreguara që përjetuan shumë prej tyre!
Ilir Meta, presidenti i Republikës
Liri Belishova u nda nga jeta ditën e hënë në moshën 92- vjeçare, ndërsa është përcjellë nga të afërm, miq, bashkëvuajtës dhe dashamirës sot në orën 14:00, për në varrezat e Sharrës.