Ish-deputeti i Parlamentit të parë Pluralist të Shqipërisë, Ndue Totrraj është ndarë nga jeta.
Pasi humbi betejën me sëmundjen e rëndë që po luftonte prej vitesh, Totraj ka humbur jetën duke lënë të pikëlluar familjarët e tij.
Ai ka qenë i kandiduar edhe disa herë si drejtues vendor në Bashkinë e Rrëshenit.
Të afërmit dhe miqtë e tij kanë shkruar disa dedikime prekëse në rrjetet social.
“Ndahet nga jeta daja im Ndue Zef Totri nga nje semundje e rende, ne nje moshe shum te para koheshme duke lene ne pikellim gruan me tre femijet motrat dhe te gjith te afermit e tij. Do ngelesh perjet ne zemrat tona i dashur Ndue. Pushofsh ne paqen e zotit”, shkroi një i afërm i tij në Facebook.
Kryetari i Kuvendit, Gramoz Ruçi u ka dërguar një letër ngushëllimi familjarëve të ish deputetit Ndue Totri.
Ish deputeti Totri u nda nga jeta në moshën 63 vjeçare pas një beteje prej vitesh me një sëmundje të rëndë.
“Me dëshpërim mora lajmin e hidhur për ndarjen e parakohshme nga jeta të Ndues, bashkëshorti, babait, vëllait dhe njeriut tuaj të shtrenjtë dhe ish kolegut tonë të dashur deputet të Kuvendit të Shqipërisë.
Ndue Totri është një nga inxhinierët dhe specialistët e shquar të Shqipërisë, që ia kushtoi jetën Shqipërisë, Mirditës dhe njerëzve.
Kudo ku shërbeu si inxhiner në industrinë minerale, si funksionar publik në niveletet lokale e qendrore, dhe si deputet i Kuvendit të Shqipërisë gjatë legjislaturës 1991-1992, është shquar për profesionalizmin e spikatur, përkushtimin e lartë, shpirtin e madh dhe zemrën e gjerë.
Nduen do ta kujtojmë me dhimbje, mall e respekt të thellë për shërbimet që i ka bërë Mirditës së tij të dashur dhe të gjithë Shqipërisë, ekonomisë, shoqërisë, komunitetit, minatorëve, qytetarëve dhe të gjithë atyre me të cilët ka ndarë përkushtimin dhe sakrificat e tij për Shqipërinë”, shkruhet në mesazhin e ngushëllimit të Kryetarit të Kuvendit, Gramoz Ruçi.
