Këshilli Bashkiak i Gjirokastrës i akordoi titullin “Qytetar Nderi” (pas vdekjes) mjekut të mirënjohur Drini Dobi. Kanë qenë një grup mjekësh të spitalit “Omer Nishani” në Gjirokastër, të cilët në 1-vjetorin e ndarjes së tij nga jeta i propozuan Këshillit Bashkiak akordimin e këtij vlerësimi.
Titulli mjekut gjirokastrit i'u akordua me motivacionin “Mjek i shkëlqyer, simbol i sakrificës dhe humanizmit, profesionist brilant që e nderoi bluzën e bardhë dhe qytetin tonë kudo ku punoi dhe dha kontributin e tij”.
Pjesëmarrësit në aktivitet, përfaqësues të institucioneve publike dhe pushtetit vendor, familjarë, mjekë, miq dhe kolegë evidentuan vlerat njerëzore, humanizmin dhe kontributin e rëndësishëm profesional të Dr.Drini Dobit në mjekësinë shqiptare.
Drini Dobi humbi jetën si pasojë e COVID-19 në moshën 51- vjeçare. Ai ishte njëri ndër mjekët neurologë më të mirë në Shqipëri. Punoi për më tepër se dy dekada në QSUT dhe prej dy vitesh drejtonte Shërbimin Neurovaskular.
