Vllaznia e futbollit surprizoi dje në mbrëmje, teksa emëroi në stolin e skuadrës trajnerin Goce Sedloski. Pas vetëm dy javësh në drejtimin e skuadrës, Vllaznia ka larguar Auron Milotin, me këtë të fundit që në përballjen e parë dhe të vetme në stolin e kuqebluve barazoi 0-0 me Bylisin në "Loro Boriçi".
Duket se stafi drejtues i Vllaznisë ka gjetur një trajner me eksperiencë, teksa 48-vjeçari nga Maqedonia e Veriut ka një CV të pasur si ish-futbollist dhe trajner. Kampion sezonin e fundit me Shkupin në Maqedoninë e Veriut, Sedloski ka drejtuar edhe ekipin e dytë të Dinamos së Zagrebit apo edhe Horizont, Vardar, Riga dhe Siroki Brijeg.
Si futbollist, trajneri i ri i Vllaznisë ka luajtur edhe në Premier League me Sheffield United, teksa ka veshur edhe fanellat e Pobeda, Hajduk Split, Dinamo Zagreb, Zagreb apo edhe Mattersburg në Austri.
Pritet që klubi shkodran të sqarojë të ardhmen e Auron Milotit, teksa mund të ketë sërish një rokadë postesh me Vioresin Sinanin për rolin e drejtorit sportiv. Nuk përjashtohet mundësia që Miloti të largohet nga organika e kuqebluve.
Komente
Keshtu eshte kur klubi legjende i veriut drejtohet nga Bashkia dhe disa injorante qe merren me "fidane fitimprures" neper Dukagjin apo ne Malesine e Madhe. Turp.
Përgjigju