Bizneset shqiptare do të paguajnë më pak për pullat fiskale. Pas përfundimit të kontratës koncesionare që ofronte shërbimin e pullave fiskale prej vitit 2012, qeveria tashmë ka miratuar çmimet e reja të pullave me ulje çmimi deri në 25%.
Bazuar në vendimin e qeverisë të publikuar në Fletoren Zyrtare bizneset do të paguajnë 15.65 euro për 1 mijë pulla fiskale, ndërkohë deri vjet paguanin 20 euro për 1 mijë copë.
Po ashtu është ulur edhe çmimi për produktet e alkoolit, nga 32 euro për 1 mijë pulla, në 25.05 euro. Bazuar në vendimin edhe për produktet e birrës pullat do të kushtojnë më pak nga 22 euro në 17.22 euro për 1 mijë copë, ndërsa për verën kostoja do të jetë 25.04 euro.
Ulja e çmimit për pullat fiskale ishte e premtuar nga qeveria që në verën e vitit të kaluar kur u njoftua se nuk do të ketë rinovim të kontratës koncesionare me kompaninë SICPA që kishte koncesionin prej 2012.
Pullat e reja do të jenë me elemente të shumta sigurie për gjurmimin e tyre. Çdo pullë fiskale përmban një identifikues të sigurt dhe të koduar për sistemin e gjurmimit, kanë kode të dukshme e të padukshme gjithashtu ato janë rezistente ndaj ndërhyrjeve nga sfondi dhe të verifikueshme nga konsumatorët dhe autoritetet përkatëse.
Tashmë pullat do të prodhohen, shpërndahen dhe monitorohen nga një shoqëri shqiptaro-arabe e regjistruar në Qendrën Kombëtare të Biznesit që quhet “AlbTrace Co”, ku 51% e aksioneve zotërohen nga Shtypshkronja e Letrave me Vlerë dhe 49% nga “O&S Security and Solutions”, e regjistruar në Emiratet Arabe.
Shoqëria e re do të funksionojë nën administrimin e Shtypshkronjës së Letrave me Vlerë, dhe do të ketë si qëllim fuqizimin e kapaciteteve të saj në menaxhimin e proceseve të prodhimit dhe shpërndarjes së pullave fiskale.
Pullat e reja praktikisht nisin shpërndarjen nga muaji i ardhshëm pasi deri në datë 31 mars bizneset do të përdorin pullat prodhuara nga kompania koncesionare.
Komente
