TIRANË - Pasi shpalli listën me 23 emrat e grumbulluar për dy miqësoret e muajit shtator kundër Gjermanisë në Elbasan dhe Zvicrës në udhëtim, trajneri i Kombëtares U-21, Alban Bushi, doli para medieve për të shpjeguar zgjedhjet e tij. 'Loku' tregoi edhe për dy risitë, mbrojtësin e Veronas, Adi Kurtin dhe portierin e Interit, Alain Taho, duke thënë se sheh potencial që në një të ardhme dyshja të jenë pjesë e Kombëtares A. Ata u afruan për herë të parë në ekipin U-21 nga Kombëtarja U-19.
"Për sa i përket Kurtit dhe Tahos, kanë qenë pjesë e moshave të ekipeve kombëtare. Ne kemi nevojë për mbrojtës dhe portier. Mendoj që të dy janë lojtarë që do të jenë pjesë edhe e kombëtares A mbase në të ardhmen se kanë shumë potencial. Për momentin i kemi afruar për t’i parë më nga afër, meqë janë edhe miqësore.
Ta dimë edhe më mirë potencialin e tyre. Mendoj se janë dy lojtarë shumë premtues. Mendoj që kemi bërë maksimumin përsa i përket lojtarëve nga kampionati shqiptar. Nuk është se ka shumë. Këto të 6 mendoj janë cilësorë dhe janë në formë, kanë minuta në këmbë, janë titullarë në ekipet e tyre. Mendoj se do na ndihmojnë në këto dy ndeshje. Lojtarë që kanë qenë edhe më përpara, siç është Gudjufi. Ka qenë vjet, por nuk ka pasur shumë minuta. Tani ka filluar të luajë te Partizani, kam shumë besim tek ai. Ndeshjen e fundit me Vorën e pashë “live” dhe m’u duk shumë në formë”, u shpreh Bushi mes të tjerash.
Miqësorja e parë, Shqipëri U-21 - Gjermani U-21, do të luhet më 5 shtator, në orën 18:00, në stadiumin “Elbasan Arena”.
Takimi i dytë, Zvicër U-21 - Shqipëri U-21, është programuar të hënën, më 8 shtator, në orën 18:30, në stadiumin “Brügglifeld” të qytetit Aarau.
Lista me 23 lojtarët e ftuar nga stafi teknik i Kombëtares U-21
Komente
