Bosi turk i kriptomonedhave, Faruk Fatih Ozer është ekstraduar sot drejt Turqisë. Gjykata e Lartë i hapi rrugë ekstradimit vetëm dy ditë më parë dhe sot autoritetet e dy vendeve ekstraduan Faruk Fatih Ozer drejt Turqisë.
Arrestimi i tij
SHISH dhe Forcat Operacionale ndoqën për 5 javë Faruk Ozerin dhe dy shqiptarët. Jetesa e tij shtrihej me Elbasanit dhe resortit luksoz në Palasë. Për disa javë, Ozer ka shijuar plazhin e jugut në vend duke ndryshuar edhe pamje për të mos u njohur, me flokë të qethura dhe me mjekër. Ozer është identifikuar nga gjurmët e gishtërinjve që linte teksa pushonte në ambientet e plazhit luksoz. Bashkë me 28-vjeçarin u kap në Palasë të Himarës e bashkë me të u arrestua edhe Edevaldo Haxhiu, nipi i presidentit të Federatës Shqiptare të Futbollit, Armand Duka që akuzohet se e ndihmonte të shumëkërkuarin që t’i fshihej autoriteteve. Bosi i kriptomonedhave fshihej prej 4 muajsh në një banesë me qira në Elbasan, jo në emër të tij të cilën dyshohet se ia kishte siguruar Edevaldo Haxhiu.
Skema e mashtrimit
Faruk Ozer i arratisur prej muajit prill të vitit 2021 akuzohet në Turqi se në bashkëpunim me persona të tjerë ngriti një skemë mashtrimi nëpërmjet krijimit dhe shitjes së monedhave virtuale përmes kompanisë që vetë ai themeloi duke mashtruar rreth 400 mijë persona që investuan në platformën e tij, tashmë të mbyllur. Autoritetet atje i bllokuan llogaritë bankare të kompanisë THodex ku iu gjetën 16 milionë lira. Sipas mediave turke, në momentin që është arratisur nga vendi, Faruk Ozer kishte me vete një server ku mbahen 108 milion dollar në formë kriptomonedhash. Në Turqi janë arrestuar disa bashkëpunëtorë të 28-vjeçarit me akuzën e mashtrimit.
Faruk Fatih Ozer, themeluesi i kompanisë së shkëmbimit të kriptove Thodex, të cilin Shqipëria vendosi ta ekstradonte në Turqi, u dërguar sot në Stamboll me avion. Mediat turke kanë publikuar pamjet e mbërritjes në Turqi. Nga pamjet duken masa të rrepta sigurie me 6 oficerë dhe 2 furgonë që kanë mbëritur në aeroport. Ozer u ndalua përkohësisht në Shqipëri, ku u arratis me kërkesë të Ministrisë së Drejtësisë turke.
