GJKKO dënon me 15 vite burg në mungesë Domart Konjarin, i cili akuzohet për vrasjen e Devi Kasmit në vitin 2018
Prokuroria e Posaçme Anti Korrupsion (SPAK) kërkoi më herët nga Gjykata e Posaçme dënim me 15 vite burg për Domart Konjarin. Konjari akuzohet për “trafik narkotikësh” dhe “organizatë kriminale”.
Ai u arrestua në nëntor 2015 për llogari të një urdhër-arresti të lëshuar nga autoritetet franceze të drejtësisë. Konjari u lirua nga qelia 5 muaj më vonë, pasi Apeli i Krimeve të Rënda zbuti masën e sigurisë nga “arrest në burg” në “detyrim për paraqitje”.
Në nisje të gjykimit të tij tek Krimet e Rënda, që vijoi më pas në Gjykatën Speciale, gjykata rrëzoi kërkesën e avokatit të tij për ta transferuar procedimin në Francë.
Ai është i akuzuari kryesor për ekzekutimin e Devi Kasmit, me të cilin kishte pasur edhe bashkëpunim në fushën e narkotikëve. Madje dyshohet se drejtonin bashkë në Spanjë një grup të trafikut të drogës, një nga furnizuesit e Europës me kokainë.
