Apeli i Posaçëm vendos të heqë masën e sigurisë arrest shtëpie të vendosur nga GJKKO për avokatin Besard Logu. Po ashtu, Apeli i Posaçëm vendosi për të masën e mos-ushtrimit të profesionit, për shkak të rrethanave familjare.
“Ndryshimin e Vendimit Nr. 92, datë 11.09.2025 të Gjykatës së Posaçme të Shkallës së Parë për Korrupsionin e Krimin e Organizuar.
Caktimin ndaj Z. B.L. të masës së sigurimit ndalues të parashikuar nga neni 243 i Kodit të Procedurës Penale, duke urdhëruar ndalimin e përkohshëm të ushtrimit të profesionit të avokatisë.
Urdhërohet sekretaria gjyqësore që një kopje të këtij vendimi t’i njoftohet Dhomës Kombëtare të Avokatisë”, thuhet në vendimin e Apelit të GJKKO.
Në 10 shtator të këtij viti, ndaj avokatit Besart Logu, u vendos masë sigurie ‘arrest në shtëpi’ nga GJKKO, pasi akuzohet nga SPAK se i mori 8 mijë euro një një klienti italian me qëllim për të ndikuar tek organet e drejtësisë për çështjen e tij.
Në njoftim, SPAK bënte me dije se avokati Logu i mori paratë prej 8 mijë për të ndikuar të funksionarët e drejtësisë, dhe jo për shërbime avokatie, siç pretendoi pak më herët vetë avokati në një reagim në rrjetet sociale.
Prokuroria e Posaçme bën me dije se e ka të dokumentuar me përgjime dhe filmime marrjen e parave nga avokati Logu, episod i ndodhur më 13 dhjetor 2024.
Hetimi për avokatin ishte regjistruar më herët, në datë 27 nëntor 2024, në bazë të kallëzimit nga vetë klienti i tij.
Report Tv mëson se shuma e parave prej 8 mijë, avokatit Logu iu dorëzua nga një agjent i infiltruar i BKH-së, që ishte prezantuar si i afërm i klientit italian.
Këto para, avokati i kishte premtuar se do t’i përdorte për të ndërhyrë te prokurori e gjykatësi me qëllim që ta lironte nga qelia klientin e tij.
Që prej dhjetorit 2024 e deri më tani, ka rezultuar se avokati i ka mbajtur për vete paratë dhe nuk kanë prova që t'ua ketë dhënë funksionarëve të drejtësisë. Megjithatë hetimet vijojnë ende për dokumentimin e plotë të rastit.
Komente
