Kryetari i Partisë Demokratike, Sali Berisha, akuzoi sot nga Malësia e Madhe ish-kryetarin Lulzim Basha se kishte shkatërruar partinë dhe opozitën, duke bashkëpunuar me kryeministrin Edi Rama, në atë që e quajti “idil gili-vili”.
Mes të tjerash ai i bëri thirrje demokratëve që kishin kaluar te Demokratët Euroatlantikë dhe Koalicioni Euroatlantik i Bashës, të cilin e quajti edhe “Lul Brava”, që të riktheheshin në PD dhe të mos gënjeheshin prej tij.
Berisha përmendi emrin e fisit Kokaj, në zonën e Shkodrës, që janë anëtarë të partisë së re të Bashës dhe një prej tyre madje kandidon për deputet më 11 maj për KEA, që “nëse u kishte mbetur një miligram gjak demokrati, të riktheheshin në PD”, nga frika e çarjes së votave.
Sot në mbrëmje (5 prill), kandidati për deputet i Koalicionit Euroatlantik në qarkun Shkodër, Anton Kokaj, i është përgjigjur Sali Berishës për komentet që ka bërë në lidhje me familjen e tij, duke theksuar ‘krenarinë për prejardhjen dhe qëndrimet e familjes Kokaj ndër vite’.
“Familja ime është përballur me persekutimin dhe internimin, por ka qëndruar gjithmonë në anën e moralit dhe burrnisë”, shprehet ai.
Në reagimin e tij, Kokaj i kujton vitin 1997, kur familja e tij i hapi derën Berishës në një nga momentet më të vështira për vendin. Në fund, ai i drejtohet kreut të PD-së me një thënie të Gjergj Fishtës: “I urti kurrë nuk ngutet, prej burrnie e jo prej tute.”
Reagimi i plotë i Anton Kokajt:
“Doktor, më thanë që sot je marrë me fisin Kokaj, me familjen time, për të cilën jam krenar dhe e mbaj kokën lart. Kjo është një familje që, pavarësisht sfidave e përballjeve ndër vite, ka qëndruar gjithmonë në anën e parimeve, të moralit dhe të burrnisë.
Familja Kokaj është ndër tri familjet e para që u shpallën kulakë në rrethin e Shkodrës. U persekutua, u internua dhe kurrë nuk ka pasur një triskë të Frontit. E besoj se këtë fakt e njeh mirë, Doktor.
Është po kjo familje që u rreshtua ndër të parat në mbrojtje të demokracisë dhe të lirisë. Besoj të kujtohet mirë viti ’97, kur në ditët më të vështira, derën e shtëpisë sonë e gjete të hapur, dhe u prite e u përcolle, pavarësisht gjithçkaje që ndodhi në atë vit të vështirë për shqiptarët.
Ndaj, Doktor, një burrë i vërtetë nuk harron dhe nuk e përdor fjalën për të baltosur ata që regjimi i djeshëm e i sotëm i ka përndjekur — ata që të kanë qëndruar pranë në ditët më të errëta. E në fund, po të kujtoj edhe një thënie të Gjergj Fishtës: “I urti kurrë nuk ngutet, prej burrnie e jo prej tute”.
Postimi i kandidatit Kokaj dhe përgjigja ndaj Berishës
Komente
