Mbledhja e Konferencës së Kryetarëve është shoqëruar me debate në lidhje me interpelancën e kërkuar nga Gazment Bardhi me kryeministrin Edi Rama për akuzat ndaj vëllait të tij.
Bardhi, duke ju drejtuar kryetares së Kuvendit Lindita Nikolla, tha se ‘Rama ska tagër ligjor dhe kushtetues të vendos arsyet dhe temat e thirrjes në interpelancë ashtu siç nuk ka tagër të refuzojë’.
‘Kushtetuta dhe rregullorja të detyron të perfshish në rendin e ditës interpelancën me Kryeministrin. Sot jam njoftuar publikisht nga Kryeministri, për refuzimin e interpelancës. E ke i shndërruar republikën parlamentare në republikë kryeminsitrite. Nuk ka tagër ligjor dhe kushtetues që kryeministri te vendos arsyet dhe temat e thirrjes në interpeleancë ashtu siç nuk ka tagër te refuzoje. Kjo është shkelje e hapur kushtetuese.’- tha Bardhi.
Ndërkohë Nikolla iu përgjigj duke nënvizuar se ‘interpelanca nuk parashikon çështje personale’.
Por debati vijoji sërish nga ana e Bardhit.
‘Çështjet që kam ngritur ndaj Kryeministrit, nuk janë çështje personale. Nuk kam interes se si shkon ai me vëllain e tij apo pse i ka vënë mbrojtjen nga garda dhe nga kush kërcënohet vëllai për tu mbrojtur nga oficerët e gardës.’- tha Bardhi.
Në diskutime është përfshirë edhe drejtuesi i grupit parlamentar në PS, Bledi Çuçi i cili tha se kërkesa për interpelancë e Bardhit s'ka lidhje me veprimtarinë e Kryeministrit.
"Këtu jemi në Konferencë Kryetarësh, jo në mbledhje grupi parlamentar apo mbledhje partie. Përgjigjja është e qartë, s'ka lidhje me objektin e kërkesës për interpelancë që kërkon Bardhi. Nuk mund të jetë çdo tryezë për të thënë çdo gjë që na vjen në mendje. S'ka arsye të zgjatemi në këtë pikë", deklaroi Çuçi në mbledhjen e Konferencës së Kryetarëve.
Edhe deputetja Elisa Spiropali nënvizoi në fjalën e saj se ‘Akuzat, shpifjet, fantazitë apo trillimet nuk i para shikon neni 96 për interpelancat parlamentare."
Ministrja shtoi se si qeveri janë të gatshëm që të përgjigjen ‘për detyrat, veprimtarinë dhe funksionet tona.’
"Barrën e provës e ka akuzatori jo i akuzuari. Të shkojë të japë përgjigje në SPAK."- tha Spiropali.
