Prej 3 javësh në gjendje kritike, mes lutjeve të besimtarëve dhe klerëve, kisha Ortodokse Autoqefale e Shqipërisë, njoftoi se gjendja e kryepeshkopit Anastas, mbetet e qëndrueshme dhe së fundi më një përmirësim të vogël.
Në spitalin “Ungjillëzimi” në Athinë, ku kryepeshkopi i Shqipërisë qëndron i shtruar në intubim pas një operacioni kirurgjikal, shkoi për tu interesuar edhe Mitropoliti i Laodikesë, Theodhorit i cili bashkë me priftërinjtë që e shoqëruan kryen lutje për shëndetin e prelatit 95-vjeçar.
‘Hirësia e Tij i përcolli Episkopit të Krujës, z. Anastas, urimet e Patriarkut Ekumenik, si dhe urimet e tij personale. Hirësia e Tij, Episkopi i Krujës, e vuri në dijeni për gjendjen shëndetësore të Kryepiskopit, e cila mbetet e qëndrueshme, me një përmirësim të vogël. Më tej, ai shprehu falënderimet e tij të përzemërta për interesimin, lutjet dhe urimet e Patriarkut Ekumenik, duke i kërkuar atij që t’a falënderojë Patriarkun Ekumenik përzemërisht dhe me respekt për interesimin e treguar’, thuhet në njoftim.
Kryepeshkopi Anastas Janullatos ndodhet prej 30 dhjetorit të 2024-ës i shtruar në spital, fillimisht në Tiranë për shkak të një viroze stine. Më pas gjendja e tij u përkeqësua për shkak edhe të një gjakderdhjeje në sistemin e aparatit tretës, për të cilën u dërgua në Athinë më 3 janar.
Gjatë kësaj kohe në spitalin ku ndodhet i shtruar, kanë shkuar për vizitë krerë të shtetit grek, por edhe drejtues të rëndësishëm të qeverisë dhe politikës shqiptare.
Komente
