Një 21-vjeçar është vënë në prangat e policisë, si bashkëpunëtor i vendosjes së një sasie eksplozivi në një objket në ndërtim në zonen e Ranës së Hedhur në Shëngjin, ngjarje e ndodhur me 19 nëntor të vitit 2020.
Angli Stafuka banues në Fushë-Krujë u ndaluar me urdhër të prokurorisë, për veprat penale "Shkatërrimi i pronës me eksploziv”, “Prishja e qetësisë publike”, “Mbajtja pa leje e municioneve luftarake” dhe “Kanosja”.
Ky shtates dyshohet se në bashkëpunim me Erald Pajtanin (i ndaluar gjatë operacionit "Eksplozivi", në dhjetor 2020), të ketë vendosur në një nga kolonat e një objekti në ndërtim, në pronësi të biznesmenit Liman Gjoka një sasi lënde plasëse, ku nga shpërthimi i së cilës u shkaktuan dëme të konsiderueshme materiale.
Hetimet në lidhje me këtë ngjarje po drejtohen nga Prokurori Françesk Ganaj dhe sipas burimeve Angli Stafuka, ka qenë në rolin e ndihmësit për vendosjen e lëndës shpërthyese, ndërsa përfshirja e tij në këtë ngjarje është zbuluar në bazë të qelizave telefonike.
Gjatë marrjes në pyetje 21-vjeçari ka mohuar të ketë lidhje me ngjarjen. Të njëjtin qëndrim ka mbajtur edhe Erald Pajtani i cili është arrestuar disa muaj më parë, por pavarësisht pretendimeve të tyre organi i akuzës ka arritur të grumbullojë prova që i përfshin dy të rinjtë në këtë ngjarje.
Objekti në ndërtim i biznesmenit Liman Gjoka u sulmua dy herë me lëndë plasëse, konkrektisht në muajit nëntor dhe dhjetor të vitit 2020, ndërsa për shpërthimin e dytë ende nuk është arritur të zbulohen autoret, pavarësisht se ka dyshime se mund të jenë të njëjtit persona.
Nga hetimet e deritanishme dyshohet se shkak për këto ngjarje të jenë bërë konfliktet e pronësisë në lidhje me truallin ku po ndërtohet objekti disa katesh, në breg të detit pranë në zonën e Ranës së Hedhur në Shëngjin.
Komente
