Kryetari dhe deputeti i PDIU-së, Shpëtim Idrizi, deklaroi sot se ai nuk është antiminoritar apo antigrek, por Çështjen e Çamërisë nuk mund ta lërë jashtë Parlamentit dhe vëmendjes në asnjë moment, ndaj edhe zgjedhjet politike ecin në këtë projekt të forcës që drejton.
Ligjvënësi tha se ai është kundër Vangjel Dules pikërisht sepse nuk e mbështet çështjen Çame dhe kundër Fredi Belerit për interesat e errëta që ai përfaqëson si antishqiptar, por kurrsesi nuk është kundër të drejtave dhe respektimit të minoriteteve.
I ftuar në ‘Studio Live’ të Report Tv, Idrizi shpjegoi edhe aleancën me PD (Koalicioni pwr Shqipërinë Madhështore) në zgjedhjet parlamentare të 11 majit, ku tha se nuk e dinte se Berisha do bënte koalicion edhe me PBDNJ-në e Dules dhe 24 parti të tjera, teksa vuri në dukje se PDIU ka qenë fuqishëm në mbrojtjen e Çështjes Çame, saqë detyroi edhe forcat e mëdha PD-PS me nismën e saj që të miratonin kërkesën drejtuar Greqisë për heqjen e Ligjit të Luftës pas tetë dekadash.
“Çështjen Çame nuk e lëmë jashtë Parlamentit. Në këtë kuadër është edhe projekti dhe aktiviteti politik i PDIU-së ndër vite, mund ta verifikoni edhe në legjislaturat e kaluara aleancat apo koalicionet tona. Unë kam firmosur me Berishën dhe PD, nuk e kam ditur se me sa parti do bënte koalicion, nëse ka vendosur 25 parti të tjera do të thotë se u mendua të përfshiheshin edhe ato. Unë nuk kam probleme me minoritetin, unë nuk jam antigrek, por unë problemin e kam me Vangjel Dulen dhe Fredi Belerin, sa herë nuk pranojnë çështjen Çame apo lidhjet me qarqet e lobet nacionaliste greke”, tha kreu i PDIU.
Dhe duke ndjekur këtë diskurs shpjegimi, ai nënvizoi se edhe PD bëri gabim të madh me kandidaturën e Fredi Belerit në Himarë për Bashkinë, më 14 maj. Gjithashtu edhe këmbëngulja e PDIU-së për të detyruar parlamentin shqiptar që t’i kërkojë Greqisë heqjen e Ligjit të Luftës.
“PD bëri gabim të madh që vendosi Fredi Belerin në Himarë. Një njeri i dënuar për pushtimin e territorit shqiptar, i akuzuar për masakrën e Peshkëpisë, apo që thotë jeni nga Kaukazi, jeni helenë, unë do të jem kundër atij dhe çdo qëndrimi të tillë. E kam thënë dhe e them përsëri. Dulja nuk duhet të jetë i papranueshëm vetëm për mua, por edhe për PD dhe PS. Po kështu edhe Beleri. Ne nuk mund të heshtim për Çështjen Çame. Ne i respektojmë minoritetet. Por u desh kërkesa jonë që të detyronte PD dhe PS për t’i kërkuar pas tetë dekadash Greqisë heqjen e Ligjit të Luftës. Ne nuk jemi antigrekë! Ne duam të zgjidhim çështjen çame”, tha ndër të tjera Idrizi në ‘Studio Live’.
Kryetari i PDIU-së, Shpëtim Idrizi, shpjegoi në ‘Studio Live’ ditën e sotme, se integrimi i Shqipërisë në BE nuk kalon nga Greqia dhe se dy partitë e mëdha, PD dhe PS, bënë ndryshime të gabuara në Kodin Zgjedhor, duke i mbyllur pothuajse tërësisht listat për deputetë.
Ligjvënësi gjithashtu shpjegoi për Report Tv se zgjodhi listën e hapur pasi bëhet fjalë për zgjedhje parlamentare dhe kryetari duhet të jetë në krye të betejës, teksa shtoi se PD e dëmtoi veten shumë me aktivitetet e saj politike të viteve të fundit, duke iu referuar ‘luftës civile’ brenda demokratëve në betejën Basha-Berisha, djegien e karrigeve apo “revolucionin”.
“Lista nuk është e PD, por e koalicionit opozitar. Ka pabarazi të votës, problemi dhe mangësi më i madh i sistemit. Sistemi nuk favorizon partitë e vogla. PD ishte për dy vite në luftë civile dhe në pritëm për atë që do ndodhte atje, sikurse edhe problematika e çështjes së vulës. Përsa i përket listave për deputetë mund të them se këto janë zgjedhje politike dhe kryetarit i takon lista e hapur, ndaj edhe unë gjendem në listën e hapur”, shprehet Idrizi.
Ai vuri theksin te fakti se integrimi nuk është në varësi të Greqisë. Teksa PDIU ka plane e projekte edhe për ngritjen e institucioneve të veçanta në funksion të Diasporës e jo vetëm.
“Integrimi i Shqipërisë në BE nuk kalon nga Greqia. Kemi propozuar dhe plan për institucione që të përfaqësojnë edhe Diasporën apo sektorë të tjerë që lidhen me Emergjencat Civile, që të forcohen strukturat konkretisht dhe që i shërbejnë qytetarëve. Sistemi fiskal apo për pensionet”, shprehet deputeti.
Më tej ai vë në dukje defektet dhe problematikat që solli Kodi Elektoral apo përçarja e PD-së vitet e fundit me fraksionet e krijuara. Ndërsa shpreh shqetësim se në listat e mbyllura nuk ka asnjë përfaqësues emigrant.
“PD u mor me luftën civile dy vitet e fundit, apo me atë që e quajti revolucion dhe djegien e karrigeve në parlament. Listat me Kodin e ri pothuajse u mbyllën fare. Emigrantët dërgojnë 1 mld euro remitanca dhe ne nuk mund t’i neglizhojmë apo lëmë pas dore. S’mund t’u kërkojmë remitancat dhe pastaj t’u themi hajdeni votoni për ne se do mundim kundërshtarët. Nuk ka asnjë deputet emigrant në listat e mbyllura, është butafori, edhe në kohën e mbretit Zog kishte deputetë emigrantë në lista dhe Parlament”, thotë kreu i PDIU-së për Report Tv.
Komente
Te kesh grek do te thosh te jesh arvanitas, pra shqiptare - konkludonte arbereshi Aristidh Kola. Dhe njesoj, antishqiptar, do te thote antigrek. Ec e gjeje cfare eshte Beleri!
PërgjigjuAgjent grek!
Përgjigju