Numri i reduktuar i gjyqtarëve dhe prokurorëve për shkak të Vettingut ka sjellë probleme ne cilësinë e gjykimit. Shqetësimi është ngritur nga Kryetari i Unionit të gjyqtarëve të Shqipërisë Gerd Hoxha në Asamblesë së Përgjithshme të Unionit të Gjyqtarëve. Hoxha ka propozuar si zgjidhje ndryshimin e ligjit për shkollën e Magjistraturës në mënyre që kandidatët për gjyqtarë të vitin e tretë të angazhohen në gjykim.
"Një situatë të ngarkuar veçanërisht me numër të madh të çështjeve gjyqësore në një anë dhe nga ana tjetër, një numër të reduktuar të magjistratëve, jo vetëm gjyqtarë por edhe prokurorë cka ka sjellë vështirësi në evadimin e çështjeve, një zgjatje të kohës së gjykimit por ndonjëherë ka ndikuar dhe në prekjen e cilësisë së gjykimit", tha Gerd Hoxha.
Problemet ne gjyqësorë për shkak të procesit të Vettingut u pranuan edhe nga kryetarja e KLGJ, Naureda Llagami.
"Sistemi gjyqësor nuk është në një situatë optimale. Kemi humbje të mëdha të burimeve njerëzore që për të mirë e për të keq na kanë krijuar një situatë jo normale në ecurinë e veprimtarisë njerëzore si në ngarkesën e shtuar që ka secili prej jush dhe kjo ndikon në cilësi. Themeli është si të forcojmë besimin ndaj trupës gjyqësore dhe dhënies së drejtësisë", tha Llagami.
Kreu u Shoqatës së Avokatëve Panelist, Saimir Vishaj, propozoi emërimin e 2 këshilltarëve për çdo gjyqtar, ndërsa bëri edhe një krahasim për pagat.
"Do kërkoja që Unioni ta ngrinte më shumë zërin që çdo gjyqtar të kishte këshilltarin e vet, pse jo edhe 2 për t'u lehtësuar shumë punë. Janë shumë çështje, penale ose civile që roli i këshilltarit do të dalë të paktën në lexim ose arsyetim. Së dyti, shikoj disnivel mes rrogës tuaj kur keni më shumë ngarkesë dhe gjyqtarit të gjyqtarit të GJKKO. Nuk ka pse të jetë kjo", tha Vishaj.
Në fund gjyqtari Gerd Hoxha bëri një apel qeverisë të njohë vendimin e Gjykatës Kushtetuese, e cila ka pranuar kerkesën e 150 gjyqtarëve të Shqiperisë për një shtesë mbi 14 mijë lekë mbi pagën bazë të çdo magjistrati.
