TIRANË - Trajneri i Dinamos, Ilir Daja, foli pas barazimit 1-1 që skuadra e tij siguroi në ndeshjen e kthimit play-off në Conference League kundër Jagiellonias, zhvilluar mbrëmjen e të enjtes në 'Air Albania'. Me fitoren 3-0 në Poloni gjatë takimit të parë, është Jagiellonia që kalon në fazën e ligës të Conference League.
Daja pranoi për mediet se ky ishte maksimumi i ekipit që drejton, duke vënë theksin te largimet e merkatos apo edhe te dëmtimet.
“Pengje për eliminimin? Nuk kam asnjë peng, me gjithë problematikën që kemi pasur. Ky ishte maksimumi ynë. Kemi bërë një ndeshje kthimi shumë të mirë ndaj një ekipi shumë të fortë. Kemi probleme të mëdha për shkak të dëmtimeve. Kemi bërë një rrugëtim fantastik, mbas 15 vitesh bëmë historinë me Dinamon.
Me mungesat dhe me ikjen e dy golashënuesve, nuk mund t’i zëvendësosh lojtarët brenda një muaji. I përshëndes djemtë. Kjo ishte ndeshja ime e 60-të në Europë, por një arbitrim të tillë nuk e kam parë.
Kampionati? Nuk flas për kampionatin, jam i dënuar nga një tjetër arbitër i UEFA-s. Do të bëjmë disa zëvendësime. Kemi dy ditë kohë, mund të marrim pak energji. Kampionati nuk ka filluar akoma, presim këto 2-3 ditë për të bërë ndonjë ndërhyrje në merkato.
Na duhen lojtarë në mbrojtje dhe në sulm. Dinamo nga vetë historia dhe tradita, ka objektiva madhore. Më mirë t’i marrim gjërat me qetësi, të bëjmë zëvendësimet e duhura, të gjejmë modulin e duhur me lojtarët e rinj.
Rrugës do të shikojmë edhe objektivin. Ne nuk duhet të kishim ndërhyrje në këto momente, janë politika të klubit shitjet. Ne duhet të kishim gjetur që në janar zëvendësuesit e Zabërgjës dhe Itodos. Çdo lojtar i ri do kohën e vetë të përshtatet. Duhet të mos përballeshim me një grup të cunguar në Evropë, por të përballeshim denjësisht. Do të më vinte mirë që ta mbyllnim me një fitore. Është një rrugëtim goxha i mirë, me një kontigjent të limtuar”, tha Daja.
Komente
Respekt per trajnerin Daja!
Përgjigju