Avokati i ish-Presidentit Ilir Meta ka kërkuar lehtësim të masës së sigurisë dhe heqjen e “arrestit në burg”.
Report Tv ka mësuar se kërkesa për ndryshimin e masës së sigurisë për Ilir Metën është dorëzuar ditën e sotme nga avokati i ish-Presidentit.
Sipas mbrojtjes, tashmë nuk ekziston më mundësia që Ilir Meta mund të prishë provat, për shkak se hetimi është mbyllur dhe dosja ka kaluar për gjykim. Po kështu, në kërkesën e tij për lehtësim të masës së Metës, avokati propozoi që ish-Presidentit t’i bllokohet pasaporta në mënyrë që të mos ketë mundësi të dalë nga Shqipëria.
Kujtojmë se dy ditë më parë, SPAK i komunikoi zyrtarisht Ilir Metës mbylljen e hetimeve dhe kalimin e dosjes në gjykatë.
Ilir Meta akuzohet për korrupsion, pastrim parash dhe fshehje pasurie, për çështjet që kanë të bëjnë me dosjen e lobimit të LSI në SHBA dhe aferën CEZ-DIA.
Ish-Presidenti u arrestua më 21 Tetor 2024 dhe që prej atij momenti qëndron në paraburgim me masë “arresti në burg”.
Komente
Avokati ka te drejte, nuk ka me flori ne Kerrabe!
Përgjigju