Në Raportin për matjen e lumturisë botërore të organizuar nga Kombet e Bashkuara, që u botua këtë muaj, Finlanda, për herë të tetë, shpallet vendi më i lumtur në botë. Ky raport realizohet në 140 vende të botës dhe Shqipëria renditet në vendin e 89.
Hartuesit e tij vërejnë disa të dhëna interesante. Kështu Kosta Rika që renditet e 6-ta dhe Meksika e 10-ta, hyjnë të dyja në top 10-tëshe për herë të parë, ndërsa tendencat e vazhdueshme rritëse për vende si Lituania (16), Sllovenia (19) dhe Çekia (20) nënvizojnë përafrimin e niveleve të lumturisë midis Evropës Lindore, Qendrore dhe Perëndimore. Shtetet e Bashkuara renditen në vendin e 24, bien në pozicionin e tyre më të ulët ndonjëherë, bashkë me Mbretërinë e Bashkuar (e 23-ta) që raporton vlerësimin më të ulët që nga raporti i 2017-ës. Renditja e vendeve bazohet në një mesatare trevjeçare të vlerësimit të çdo popullsie për cilësinë e jetës së tyre.
Ekspertët ndërdisiplinorë nga ekonomia, psikologjia, sociologjia dhe më gjerë, shpjegojnë më pas variacionet midis vendeve duke përdorur faktorë të tillë si PBB për frymë, jetëgjatësia e shëndetshme, jetesa e përbashkët, ndjenja e lirisë, bujaria dhe perceptimi mbi korrupsionin. Këta faktorë ndihmojnë për të shpjeguar ndryshimet midis kombeve, ndërsa vetë renditja bazohet vetëm në përgjigjet që japin njerëzit kur u kërkohet të vlerësojnë jetën e tyre.
Xhon Clifton,drejtues i Gallupit thotë "Lumturia nuk ka të bëjë vetëm me pasurinë ose rritjen ekonomike - ka të bëjë me besimin, me marrëdhënien me tjetrin. Raporti i këtij viti dëshmon se ne e nënvlerësojmë se sa e mirë është bota në të vërtetë. Nëse duam komunitete dhe ekonomi më të forta, duhet të investojmë në atë që ka vërtet rëndësi: te marrëdhënia me njëri-tjetrin, te dashamirësia, -përfundon ai. Gjetjet në Raportin Botëror të Lumturisë së këtij viti rikonfirmojnë një të vërtetë themelore: lumturia është e rrënjosur në besimin, mirësinë dhe lidhjen shoqërore, po jo në besimin në kuptimin religjioz, porn ë besimin te tjetri në ndjenjën e mirëkuptimit, të dashamirësisë për tjetrin.
Varet nga ne si individë dhe qytetarë të virtytshëm që ta përkthejmë këtë të vërtetë jetike në veprim pozitiv, duke nxitur kështu paqen, civilizimin dhe mirëqenien në komunitetet në mbarë botën. Po përse Finlanda renditet si vendi më i lumtur në botë për të tetin vit radhazi?
Përgjigjja - BESIMI QË KARAKTERIZON të gjithë shoqërinë finlandeze, duke u mundësuar individëve të ndihen të sigurt dhe NË PAQE. Edhe njëherë, jo BESIMI FETAR, dashamirësia për tjetrin dhe jo urrejtja apo dyshimi. Një arsye tjetër është afërsia e natyrës dhe shkëputja nga rutina që ajo të ofron. Besimi është i ngulitur në shoqërinë finlandeze.
Baza për pozicionin e qëndrueshëm në vend të parë i Finlandës në lumturi shpjegohet me nivelet e larta të besimit dhe lirisë në shoqërinë e saj, për të cilat studimet tregojnë se kontribuojnë në mirëqenien dhe produktivitetin e këtij vendi.
Finlanda renditet vazhdimisht ndër më të mirat në botë për transparencën dhe mungesën e perceptuar të korrupsionit. Finlandezët priren t'u besojnë fqinjëve dhe të tjerëve, t’u besojnë zyrtarëve publikë dhe qeverisë së tyre. Finlanda është renditur lart për lirinë politike, civile dhe atë të shtypit. Për më tepër, si individët ashtu edhe institucionet përjetojnë nivele të larta lirie.
Afërsia me natyrën nxit kreativitetin dhe inovacionin. Sipas studimit të Institutit Finlandez të Lumturisë (FHI), kur i pyesin finlandezët se çfarë i bën ata të lumtur, ata përmendin gjithmonë edhe afërsinë me natyrën dhe mundësitë që ajo ofron për ripërtëritje dhe relaksim. Në Finlandë, nuk jeni kurrë më shumë se 10 minuta në këmbë nga një park ose pyll. Uji i pastër, ajri i pandotur dhe natyra e paprishur kontribuojnë shumë në mirëqenien dhe lumturinë - dhe ushqejnë kreativitetin. Në studimin e Institutit Finlandez të Lumturisë (FHI), një nga faktorët më të përmendur që ndikon në përvojën e finlandezëve si njerëzit më të lumtur në botë është «sisu», një koncept unik finlandez që kombinon guximin, elasticitetin dhe vendosmërinë.
Megjithatë, «sisu» nuk është vetëm një forcë karakteri që kontribuon në kryerjen e gjërave, por tregon një aspiratë për cilësi në mënyrën se si bëhen gjërat. Është një lloj përpjekjeje e nxitur nga integriteti drejt rezultateve më të mira të mundshme me të gjitha përpjekjet, duke u mundësuar individëve dhe kompanive të kenë sukses.
«Sisu» ndikon në përvojën e finlandezëve si njerëzit më të lumtur në botë. Është një koncept unik finlandez që kombinon grintën, elasticitetin dhe vendosmërinë. Si një nga ekonomitë më konkurruese dhe më të hapura në botë, Finlanda ofron një pikënisje të jashtëzakonshme për bizneset. Johanna Jäkälä, Drejtore Ekzekutive, për Shërbimet e Promovimit të Finlandës nga « Business Finland » thotë: "Mënyra e jetesës kundër stresit ndikon gjithashtu në kulturën finlandeze të punës. Finlanda është një vend me hierarki të ulëta dhe ekuilibri mes punës dhe jetës vlerësohet shumë. Kur njerëzit vijnë këtu, ata gjithashtu kanë qasje në një stil jetese që është mjaft unik.
Unë mirëpres individët, si dhe bizneset në Finlandë edhe për të bashkëpunuar me Finlandën, edhe për të shfrytëzuar lumturinë e biznesit. Ne dëshirojmë të mendojmë se lumturia e produktit dhe punonjësit e lumtur janë e mira e përbashkët."
Raporti i Lumturisë Botërore është publikuar nga Qendra Kërkimore e Mirëqenies në Universitetin e Oksfordit, në partneritet me Gallup, Rrjetin e Zgjidhjeve për Zhvillim të Qëndrueshëm të OKB-së dhe një bord të pavarur redaktues. Ndërsa teksti për Finlandën iu referua studimit të E. Elisabet Lahti, eksperte psikologjie dhe studiuese pioniere e konstruktit finlandez të sisu.
Komente
Nuk shkon njeri në Finlandë se do bohen të lumtun. Dojn ushtar me mbrojt kufirin me Rusin
PërgjigjuNUk banojne atje as Sala as Edi e shoket e tyre e as gazetar si ti
PërgjigjuKeto lloj testesh nk jane te sakta, une nuk besoj ne to.Mendoj se jane shpenzime kot te parave te OKB qe shumicen ja jep Amerika.
Përgjigjumos u bej merak se tani Trapi ato qe i jepte okb do te t'i jape ty qe te blesh mitralozin e markes se fundit