Romë- Inaugurohet në Vatikan selia e re e Ambasadës së Shqipërisë. I pranishëm ditën e sotme në këtë përurim ka qenë edhe ministri për Evropën dhe Punët e Jashtme, Igli Hasani, i cili e vlerësoi si një “shërbim të urave për një botë më të paqtë dhe solidare”.
Morën pjesë edhe Sekretari për Marrëdhëniet me Shtetet dhe Organizatat Ndërkombëtare në Selinë e Shenjtë, Imzot Paul Richard Gallagher, Kancelari i Madh dhe Ministri i Punëve të Jashtme të Urdhrit Sovran të Maltës, Riccardo Paternò di Montecupo, përfaqësues të trupit diplomatik të akredituar pranë Selisë së Shenjtë, si dhe autoritete të tjera.
Në fjalën e tij përshëndetëse, ministri Hasani e ka cilësuar këtë hap si dëshmi të forcimit të marrëdhënieve mes Shqipërisë dhe Selisë së Shenjtë, e cila është bërë gjithnjë e më e fortë dhe më e orientuar drejt së ardhmes bazuar në dialogun ndërfetar dhe paqen globale.
“Dinjiteti njerëzor, respekti për diversitetin, liria fetare dhe drejtësia sociale janë disa prej vlerave të përbashkëta që lidhin Shqipërinë dhe Selinë e Shenjtë. Andaj, kjo shtëpi e re e diplomacisë do të jetë në shërbim të përpjekjeve dhe nismave të përbashkëta për të ndërtuar ura për një botë më të paqtë dhe më solidare”, është shprehur mes të tjerash ministri shqiptar.
Komente
