Në renditjen globale të indeksit të perceptimit të korrupsionit Shqipëria ka 5 pikë më shumë krahasuar me vitin e kaluar dhe është rritur plot 18 vende, duke u renditur e 80-a nga 180. Në raportin e fundit të Transparency International, Shqipëria është vlerësuar me 42 nga 100 pikë të mundshme, me një rritje prej 5 pikësh nga 2023-shi, rritja më e madhe që prej vitit 2012 kur ka nisur matja.
Në Shqipëri, prokuroria dhe gjykatat e specializuara kundër korrupsionit (SPAK) kanë fituar besimin e qytetarëve pasi kanë dënuar ish-ministra, deputetë dhe kryebashkiakë. SPAK vazhdon të hetojë një ish-president, ish kryeministër dhe zyrtarë të tjerë të lartë publikë, thuhet në raport.
Vitin e kaluar Shqipëria renditej e 98 nga 180 vendet e marra në raport, me 37 pikë, ndërsa 2024 është viti i tretë radhazi që vendi shënon progres pas një rënie të vogël në vitin 2021. Raportin e këtij viti dhe përmirësimin për perceptimin e korrupsionit, e komentoi edhe Kryeministri Rama, i cili e raportin historik.
"Atëherë edhe njëherë një lajm shumë i mirë sot në mëngjes, interesant për faktin edhe të momentit ku jemi sepse raporti i Transparency International, i cili ka dalë sot, - “e vonove pak”, - po nuk e vonova more i dashur.
Po ndërkohë po iu thoja që Transparency International ka nxjerr raportin e vet vjetor ku Shqipëria ka një pozicion me 5 pikë plus ka përparimin më të madh nga gjithë vendet e tjera dhe bashkë me Kosovën janë të dyja vendet që kanë përparim. Ndërkohë që vendet e tjera në rajon janë me rënie dhe Mali i Zi ishte aty ku ishte vjet dhe sot në raportin për korrupsionin të Transparency International që është një raport global Shqipëria ka pozicionin më të mirë që ka pasur ndonjëherë. Pra “çuditërisht” edhe Transparency International vlerëson luftën që po bën Shqipëria kundër korrupsionit, përparimin në betejën me korrupsionin dhe hapat që po hidhen në këtë drejtim. Hapa, të cilat tregojnë se tanimë jemi në një fazë tërësisht të re dhe se e gjithë kjo, “bla, bla, bla, kua, kua, kuaja”, “korrupsion, korrupsion, korrupsion, korrupsion” është shumë më tepër një tam-tam propagandistik për arsyet që dihen sesa një jehonë e një realiteti konkret.
Para Transparency International patëm raportin e SIGMA-s. Tani këtyre do t’u referohemi se këta janë ata që punojnë me fakte, që punojnë me të dhëna dhe që nuk kanë axhenda politike, nuk kanë luftëra të brendshme këtu për të bërë dhe nuk kanë ambicie për të marrë vota.
SIGMA na nxori të parët në rajon për Prokurimet Publike, ca do të thotë kjo? Prokurimet më pak të afektuara nga korrupsioni në të gjithë rajonin tonë janë prokurimet që bëhen në Republikën e Shqipërisë dhe me diferencë nga vendi i dytë, Shqipëria. Të parët në menaxhimin e financave publike, të parët në organizimin dhe zhvillimin e administratës publike dhe kështu me radhë. Dhe lufta kundër korrupsionit është një luftë e cila bëhet frontalisht dhe ku çdo segment bën punën e vet. Në këtë luftë kundër korrupsionit Shqipëria ka transformuar tërësisht shërbimet e veta dhe sot falë kësaj lufte kundër korrupsionit çdo qytetar shqiptar, qoftë në Shqipëri, qoftë në Australi është në gjendje të marrë shërbim përmes kompjuterit apo telefonit pa qenë i detyruar që të niset për te sporteli, të mbajë radhë, të presë sa ti vijë radha, pastaj të nder veprojë me një person aty dhe pastaj të jetë në rrezikun e kërkimit të ndonjë bakshishi.
47 milion kontakte me një shërbim të kërkuar apo të dhënë janë zhvilluar në këto vite, falë platformës e-Albania që janë 47 milion kontakte direkt të eliminuara, kohë e humbur e shpëtuar, radha të shmangura, rrezik bakshishi i eliminuar"
Për situatën globale Transparency International thotë se korrupsioni vazhdon të rrënojë Evropën Lindore dhe Azinë Qendrore, me një mesatare rajonale që mbetet një nga më të ulëtat në Indeksin e Perceptimit të Korrupsionit në 35 nga 100. Sa i përket Ballkanit, Kosova renditet ndër vendet me rritjen më të madhe në rang global pasi Kosova këtë vit ka 44 pikë, me një përmirësim prej 3 nga viti i kaluar, që do të thotë se renditet e 73-ta nga 180 shtete.
Komente
