Asnjë shifër për mësuesit dhe nxënësit e prekur nga Covid-19 në shkolla nuk u dha nga Ministrja e re e Arsimit, Evis Kushi gjatë seancës dëgjimore me Komisionin e Edukimit.
“Çdo ditë monitorohet situata nëpër shkolla duke marrë informacion ditor për rastet e reja, mungesat apo problematika të tjera që mund të cenojnë shëndetin e nxënësve në shkolla. Zyrat arsimore kanë marrë masat për zëvendësimin e mësuesve të infektuar apo të karantinuar me mësues nga portali Mësues për Shqipërinë”, tha ministrja Kushi.
Sipas Kushit ministria po punon paralelisht edhe për mësimdhënie online, skenare që mund të shfrytëzohen në një situatë kritike të pandemisë.
“Për të mbështetur nxënësit dhe mësuesit Ministria e Arsimit po punon paralelisht edhe për mësimdhënien në distancë. Pra ne jemi të përgatitur edhe për skenarë që mund të vijnë si rezultat i përkeqësimit të situatës së pandemisë Covid-19”, u shpreh ministrja e Arsimit.
Sa i përket testimet ministria tha se respektojmë protokollin e Ministrisë së Shëndetësisë për tampon vetëm kur nxënësi apo mësuesi paraqet shenjat e Covid -19.
