TIRANË- Partia Socialiste ka propozuar një draftrezolutë për thellimin e reformave për mirëqeverisjen, sundimin e ligjit dhe luftën kundër korrupsionit për Shqipërinë 2030 në Bashkimin Europian.
Draft-rezoluta u prezantua në mbledhjen e deputetëve dhe ministrave ku ishte i pranishëm edhe kryeministri Edi Rama, nga ministrja e Shtetit për Parlamentin Elisa Spiropali. Në kuadër të kësaj rezolute PS ka propozuar edhe ngritjen e një Komisionin të Posaçëm Parlamentar, i cili do të adresojë ndërmarrjen e reformave që synojnë mirëqeverisjen, sundimin e ligjit dhe anti-korrupsionin për Shqipërinë 2030 në Bashkimin Europian.
PS i shtrin dorën opozitës që përmes hartimit të një Plani Kombëtar Veprimi, me një kohështrirje afatgjatë, si dhe me mbikëqyrjen e SHBA-së dhe BE-së, të çmohet e nevojshme dhe të merren masa konkrete për ndryshime të mundshme ligjore dhe institucionale.
Vetë Rama tha se duhet të ulen bashkë me opozitën dhe të punojnë së bashku, në rrugën i drejt Bashkimit Europian.
'Thirrja ime për ata që janë kundër nesh, është e thjeshtë, ne nuk ju ndryshojmë dot juve. Luftën tuaj bëjeni si të doni ju me gjithë arsenalin, por le ta krijojmë një hapësirë jashtë territorit të kësaj lufte një zonë të ndaluar. Një vend pune të përbashkët me aleatë tanë strategjike, me të gjitha institucionet e pavarura, për të adresuar jo dallimet tona të papajtueshme pulitke por procesin e mëtejshëm të shtet bërjes evropiane të Shqipërisë duke analizuar të gjitha hallkat e shtetit në këtë fazë të re. Thoni se e keni seriozisht të vini në pushte. Unë u them se zgjedhjet janë vitin ardhshëm, nëse ne gjithë mend do të vini në pushtet ju do të jeni të parët që të jeni të interesuar për këtë iniciativë. Konsiderojeni këtë iniciativë tonë si mundësi tuajën për të filluar të mendoni se çfarë do të bëni për rrugëtimin drejt BE-së, kjo inictivë kërkon një punë të madhe. Inictiva na duhet për Shqipërinë e 2030 ku me ndihmën e Zotit duam ta ngremë flamurin shqiptar në Bruksel ku do të jetë i pari.'- tha Rama.
Razoluta e plotë
REZOLUTË PËR THELLIMIN E REFORMAVE PËR MIRËQEVERISJEN, SUNDIMIN E LIGJIT DHE ANTIKORRUPSIONIN PËR SHQIPËRINË 2030 NË BASHKIMIN EVROPIAN
Në zbatim të Kushtetutës së Republikës së Shqipërisë, të ligjit (neneve 1, 2, 3, 6, 7, 75.2, 77.1, 78 dhe 80 të saj) si dhe të Rregullores së Kuvendit të Republikës së Shqipërisë (neneve 24, 36, 68, 98, 102, 105, 106.1 të saj),
Bazuar në Rekomandimet e Raportit të BE për Shqipërinë 2023, Raportin Screening të Komisionit Europian si dhe në Deklaratat/ Rezolutat e Samitit për demokraci të SHBA;
Të vetëdijshëm për përgjegjësinë tonë, si shprehje përbashkuese e vullnetit të mbarë zgjedhësve pa dallime partiake dhe të të gjithë shqiptarëve kudo janë për anëtarësimin e Shqipërisë në Bashkimin Evropian; në zbatim të parimteve dhe detyrimeve që burojnë nga Kushtetuta dhe ligjet e Republikës sonë; me bindjen e plotë në mundësitë e politikës dhe shoqërisë për t’iu përgjigjur domosdoshmërisë së një qasjeje kombëtare gjithëpërfshirëse në adresimin e sfidave të kësaj faze vendimtare për modernizimin e mëtejshëm të shtetit.
I. Ne, anëtarët e Kuvendit të Shqipërisë
Duke e konsideruar moment kyç të historisë sonë të përbashkët, rrugëtimin Evropian të vendit përmes negociatave të anëtarësimit me Bashkimin Evropian, pas përfundimit me sukses të procesit të shqyrtimit analitik të legjislacionit (procesi screening) dhe vlerësimit të Këshillit të Bashkimit Evropian për arritjet e Shqipërisë në të gjithë sektorët, si edhe nënvizuar gatishmërinë e vendit për t'iu përmbajtur legjislacionit të BE-së në fushën politike, ligjore, ekonomike dhe sociale;
Duke shprehur vlerësimin e përbashkët për mbështetjen strategjike që Bashkimi Evropian dhe SHBA i kanë dhënë Shqipërisë në avancimin e reformave për konsolidimin e sundimit të ligjit, forcimin e institucioneve demokratike dhe respektimin e të drejtave të njeriut;
Duke e vlerësuar Reformën në Drejtësi, si një prej lëvizjeve më të mëdha shtetndërtuese në historinë e shtetit shqiptar - më e madhja në procesin historik të kalimit nga diktatura në një demokraci funksionale – dhe duke e çmuar zbatimin e saj si një domodoshmëri për jetësimin e parimit themelor kushtetues të ndarjes dhe balancimit ndërmjet tre pushteteve si dhe për të garantuar një sistem drejtësie të pavarur, të përgjegjshëm, llogaridhënës, transparent, efiçent, profesional dhe të barabartë për të gjithë qytetarët;
Duke vlerësuar rezultatet e derisotme pozitive të reformës në drejtësi, veçanërisht në luftën kundër korrupsionit, nëpërmjet procesit të vettingut për pastrimin e burimeve njerëzore në sistemin e drejtësisë, si dhe nëpërmjet veprimtarisë së strukturës së posaçme kundër korrupsionit dhe krimit të organizuar, e cila po kontribuon në mënyrë domethënësë në dhënien fund të epokës së pandëshkueshmërisë, duke shërbyer njëherësh edhe si një vlerë e shtuar besimi për vendimin e shumëpritur të hapjes së negociatave me BE-në;
Duke qënë të vetdijshëm për domosdoshmërinë e njohjes së problematikave të vendit në këtë fazë vendimtare për anëtarësimin në Bashkimin Evropian dhe adresimin e përbashkët të prioriteteve veçanërisht në drejtim të mirëqeverisjes, sundimit të ligjit dhe korrupsionit, duke u mbështetur kryesisht në gjetjet dhe rekomandimet e shprehura në Raportet e BE dhe Raportin screening të Komisionit Evropian, të cilat kërkojnë një analizë të përbashkët objektive, një reagim të përbashkët institucional dhe një veprim të koordinuar midis të gjithë institucioneve përgjegjëse;
Duke mbështetur angazhimin me plane masash konkrete të ekzekutivit dhe të të gjitha institucioneve të përfshira, për të përmbushur detyrimet e procesit të negociatave dhe duke vlerësuar miratimin nga qeveria shqiptare të dy udhërrëfyesve të rëndësishëm “Për Shtetin e së drejtës” dhe “Për reformën në administratën publike”, si piketa hapëse të Grupkapitullit të Parë që njihet me emrin “Themeloret”;
II. Me vetëdijen e madhe për këto përgjegjësi të rëndësishme dhe për hapësirën gjithëpërfshirëse që i mundësohet Kuvendit nga Kushtetuta dhe autoriteti që i jep kuadri ligjor në fuqi, me bindjen se manifestimi i vullnetit politik dhe institucional i Shqipërisë në konceptimin, miratimin e zbatimin e Reformës në Drejtësi përbën një përvojë të vyer institucionale për t’u zhvilluar më tej, si dhe me besimin e përbashkët se vendi ka nevojë për një cikël të ri reformimi në funksion të mirëqeverisjes, sundimit të ligjit dhe antikorrupsionit, si domosdoshmëri për përmbushjen e objektivit strategjik kombëtar të anëtarësimit në Bashkimin Evropian në vitin 2030, Kuvendi angazhohet:
1. Të nxisë frymën e dialogut konstruktiv politik dhe institucional brenda kuadrit kushtetues e ligjor, ndërmjet tre pushteteve të pavarura si edhe të gjithë aktorëve institucionalë e faktorëve politik e shoqërorë në vend në funksion të një cikli të ri reformimi përmes një qasje të re gjithëpërfshirëse orientuese për aktivitetin e të tre pushteteve të pavarura të Republikës sonë, që pavarësisht njëri – tjetrit dhe në harmoni me njëri – tjetrin të angazhohen aktivisht për rritjen e ndërgjegjësimit institucional dhe forcimin e kulturës së bashkëpërgjegjësisë të institucioneve në avancimin e mëtejshëm të reformave modernizuese të shtetit në përmbushje të detyrimeve të negociatave të anëtarësimit në Bashkimin Evropian dhe në kuadrin e Samitit për Demokraci të SHBA-ve;
2.Për rritjen e fokusit të Kuvendit të Shqipërisë, në përshpejtimin e procesit të anëtarësimit në BE, për konsolidimin e demokracisë dhe forcimin e shtetit të së drejtës duke konsideruar çështje madhore të një rëndësie prioritare thellimin e reformave për përmirësimin e mëtejshëm të mirëqeverisjes, fuqizimin e luftës ndaj korrupsionit, forcimin e zbatimit të ligjit si dhe mbrojtjen e të drejtave dhe lirive themelore të njeriut;
3. Të ushtrojë në mënyrë efektive përgjegjësitë e tij kushtetuese në lidhje me rolin mbikqyrës të komisioneve të përhershme e atyre të posaçme dhe strukturave të tjera përgjegjëse parlamentare, ndaj qeverisë, institucioneve të pavarura dhe agjencive ekzekutive ligjzbatuese, brenda fushëveprimit të përcaktuar tashmë me Kushtetutë, duke respektuar parimin kushtetues të ndarjes dhe balancimit midis pushteteve, me fokus të drejtpërdrejtë adresimin e masave të Udhërrëfyesve të miratuar nga Qeveria “Për shtetin e së drejtës” dhe “Reformën në administratën publike” si dhe rekomandimet e Raportit Screening të Komisionit Evropian;
4. Të përmirësojë rolin e tij ligjvënës, monitorues dhe mbikqyrës në funksion të mirëqeverisjes në të gjitha nivelet, ekzekutive dhe ligjbërëse, qendrore e vendore, përmes mekanizmave dhe rregullave që fuqizojnë respektimin e ligjit dhe rritjen e transparencës në vendimarrje, aksesin e qytetarëve dhe gjithëpërfshirjen e shoqërisë civile në procesin legjislativ dhe vendimmarrjen e qeverisjes qendrore e vendore, parandalimin e konfliktit të interesit dhe lobimit për interesa private, thellimin e procesit të digjitalizimit të shërbimeve publike dhe kontrollin më të mirë ndaj tyre, përmirësimin e llogaridhënies dhe transparencës të pastërtisë së figurës së funksionarëve të lartë të zgjedhur ose të emëruar, forcimin e mekanizmave për kontrollin e integritetit të funksionarëve e zyrtarëve të të gjitha niveleve, ngritjen e mekanizmave funksional për transparencën financiare dhe zhvillimin e kulturës e qasjes demokratike të partive politike etj.
5. Të konsiderojë domodoshmëri jetike për të ardhmen e vendit thellimin e luftës ndaj korrupsionit e fenomenit të pandëshkueshmërisë në mënyrë kapilare në të gjitha nivelet, duke e vendosur në fokus të shoqërisë shqiptare dhe të të gjitha institucioneve të shtetit, përmes një përpjekje të bashkërenduar nga Kuvendi, zbatimit të objektivave të Strategjisë kombëtare antikorrupsion dhe të shoqëruar me rekomandime masash konkrete ligjore, institucionale dhe administrative veçanërisht për sektorët më vulnerabël ndaj korrupsionit (kadastra dhe të drejtat pronësore, taksat, doganat, arsimi, shëndetësia, përdorimi i fondeve publike, prokurimet publike, infrastruktura publike, etj), në të gjithë territorin e vendit;
6. Të thellojë më tej përpjekjet për forcimin e zbatimit të ligjit duke mundësuar një proces analitik vlerësimi dhe rekomandimesh me masa konkrete ligjore dhe institucionale që synojnë ndër të tjera edhe reformimin, me të njëjtën ambicie dhe thellësi siç vepruam me reformën në drejtësi edhe të agjencive të tjera të zbatimit të ligjit që kanë në përgjegjësi luftën ndaj korrupsionit në të gjitha nivelet e qeverisjes dhe administrimin e pasurisë publike, krimin ekonomik, parandalimin e pastrimit të parave, deklarimin dhe kontrollin e pasurive të zyrtarëve dhe konfliktit të interesit, auditimin dhe inspektimin financiar, kontrollin e brendshëm, informalitetin apo të mbikqyrjes së tregut, të rregjistrimit e administrimit të pronës etj duke synuar motivimin, integritetin, përgjegjshmërinë, llogaridhënien dhe efikasitetin më të mirë të këtyre strukturave në respektim dhe zbatim të ligjit në të gjitha nivelet e qeverisjes;
7. Të garantojë pakthyeshmërinë e reformës në drejtësi, konsolidimin e saj të mëtejshëm dhe rritjen e eficencës së sistemit të drejtësisë në pritshmëritë e qytetarëve shqiptarë, duke ruajtur parimet dhe shtyllat kushtetuese të Reformës në drejtësi të miratuar në 2016, për të fuqizuar pavarësinë dhe paanësinë e pushtetit gjyqësor si dhe njëherësh nxitjen e cilësisë së vetëqeverisjes së sistemit të drejtësisë nëpërmjet forcimit të integritetit, llogaridhënies dhe transparencës, sipas rekomandimeve të Raporteve të BE dhe Raportit Screening të Komisionit Evropian për grupkapitullin e parë si dhe masave të udhërrëfyesit “Për shtetin e së drejtës” në zbatim të tyre.
8. Të sigurojë në mënyrë transparente, në dispozicion të këtij procesi ekspertizën më të mirë vendase e ndërkombëtare (veçanërisht me partnerët strategjik, BE dhe SHBA) dhe përmes rregullave, procedurave e mekanizmave parlamentare të ngrejë një Komision të Posaçëm Parlamentar, i cili të adresojë ndërmarrjen e reformave që synojnë MIRËQEVERISJEN, SUNDIMIN E LIGJIT DHE ANTIKORRUPSIONIN PËR SHQIPËRINË 2030 NË BASHKIMIN EUROPIAN përmes një vlerësimi / analize të situatës në këto fusha si dhe hartimin e një Plani Kombëtar Veprimi, me kohështrirje afatgjatë, duke rekomanduar për sa çmohet e nevojshme edhe masa konkrete për ndryshime të mundshme ligjore dhe institucionale të cilat duhet të adresohen në secilën fushë nga institucionet përgjegjëse. I gjithë procesi që do të ndërmerret dhe mbikëqyret nga Komisioni i Posaçëm Parlamentar do të realizohet në përputhje me Kushtetutën dhe ligjet përkatëse në fuqi dhe në asnjë mënyrë nuk do të cënojë kuadrin ekzistues kushtetues e ligjor për ngritjen e institucioneve të pavarura të drejtësisë.
Ne deputetët e Kuvendit të Shqipërisë i konsiderojmë detyruese përmbajtjen dhe angazhimet e kësaj rezolute, pavarësisht dallimeve dhe vijave të qarta ndarëse politike e programatike mes nesh, në çdo aspekt dhe për çdo aspekt tjetër të jetës parlamentare.
Komente
Pika 7 bie ne kontradikte me piken 3 dhe vete pika 3 eshte problematike.Ne piken 3 po i vihet mbikqyrje inst.te pavarura si SPAK-u me ane te Kuvendit e nendegeve te tij.Nga ana tjeter,ne piken 7,po i njejti Kuvend qe ne piken 3 synon mbikqyrjen e inst.te pavarura si SPAK-u,premton moskthimin prapa te reformes ne drejtesi dhe mosprekjen e pavaresise te inst.te pavarura! Xhongler politik eshte Rama kur behet fjale per artikulime te tilla,prandaj /i zgjat/ doren opozites.Djalli eshte ne detaje!
PërgjigjuKush ben korupsion populli? Apo e ben Europa korupsionin ne shqiperi qe bejne rezolute keta te koruptuar? Cilesojeni korupsionin ne kodin penal si Tradheti Kombetare po te jeni kaq patriote ju horrat e politikes qe bete amnisti per te liruar drejtorucet qe kishin firmosur ne emrin tuaj. Demagogji e peshtire kur njerezit po marrin arratine nga korupsioni qe fillon qe me nje inspektor zone ordiner policie. Turp
PërgjigjuPartia Socialiste, shkruan propoganda, ka propozuar rezolute...po ku?? Ne Kuvend! Pra i bie te jete grupi i Kuvendit te PS. Jo Partia. Sidoqofte perceptimi eshte haptazi qe partia dhe kuvendi ne fakt jane nje. E lexoj dhe gjej plot cudira! Psh. "Ne, anetaret, e Kuvendit"... Kuvendi, sipas Kushtetutes perbehet nga Deputete, jo anetare. Partia perbehet nga anetare. Epo sic thame, dallimet jane te paperfillshme. Ndaj edhebdo ece "rrenforma" e radhes. "Duke e konsideruar moment kyç të historisë sonë të përbashkët," - te kujt mo, te anetareve/deputeteve te kesaj legislature????!!! Jo te popullit apo vendit por "sone" thone shoket e partise. Mire te keqen. "respektimin e të drejtave të njeriut;" ceshte e verteta vec te drejtave edhe per lirite themelore na kane peshtetur! "Duke e vlerësuar Reformën në Drejtësi, si një prej lëvizjeve më të mëdha shtetndërtuese në historinë e shtetit shqiptar - më e madhja në procesin historik të kalimit nga diktatura në një demokraci funksionale "??? Kjo eshte "noma" e "Mamices"!!! Komplet hipokrizi! Me e madhja nga diktatura? Mos more. Varja Kushtetutes se 1998! Tashme ka nevoje per legjitimim te rrenformes e jo dosodo por si me te madhen pas 1991shit! "Duke vlerësuar rezultatet e derisotme pozitive të reformës në drejtës", pas kaq vitesh sapo mesuam qe prova si vendim gjykate i nje vendi te BE na deshmon se krietarja e GJKK me dyzine mbiemrash, bashkeshortesh, etj, i ka bere cirk shengenit me letra false ku edhe eshte ndaluar hyrje ose "non grate"! Lind pyetja: mire kjo, po imagjino sikur "vettingun" tua ribeje FBI ose Interpol "organeve tona te reja" ??? Loz qeni kallanxhiut! Sidomos me regjistrat noteriale e civile ku kane bere namim me falsifikime per te kryer pune me vettingun. Nota 10 me yll vlersimi! "procesit të vettingut për pastrimin e burimeve njerëzore në sistemin e drejtësisë, "??? Uaaa! Gjyqtare e prokurore nuk jane te vetmet "burime" njerzore ne sistemin e "ulsinise"! Epo i duhet Kuvemdit nje komision i posacem per korrupsionin. Qe te mbikqyre Qeverine, ose perberesit e saj Kryeministri dhe Keshilli i Ministrave. Rama nuk ka kohe te kryeje funksionet dhe detyrat qi i ngarkohen. Mire e ka menduar. "7. Të garantojë pakthyeshmërinë e reformës në drejtësi, "- papapapa reforma ne drejtesi mos e ceke njeri! Ka nevoje tjetri dhe po hedh grepin qe mire Sala por Meta, Mediu, Basha e skuthet e tjere edhe mund ta kapin krimin. Ata per krrimba jetojne ne fakt te gjithe. Pra e do me firme shoku Rama kete pune. Dmth si puna e kanabisit dhe kapter Lleshit: Tahiri me shoke bente kerdine, Rama tallte menderen me plane veprimi! Epo sa letra, strategji e plane ka Shqiperia, edhe nje nuk ben keq. Por kesaj radhe le tua japin profesionisteve: si Charles McGonigal; Sajmir Tahiri; Narit te Kokeve ose "Akullores" meqe Laze Hasani nuk del oer media; Doshit e Frrokut. Ore ne fund te fundit Rama keta perdor per keto pune dhe dine si leftohet! Pastaj meqe gjasat jane dhe Veliaj tu bashkohet.me Berishen e Meten garantohet harmonia dhe gjitheperfshirja sipas rekomandimeve te halehateve ne SHBA e BE. "Ne deputetët e Kuvendit të Shqipërisë i konsiderojmë detyruese përmbajtjen dhe angazhimet e kësaj rezolute,"- heheeeeee, ja dhe dora e don Agacios, ose Shametkes ose Gumkes! Fundja nje mbeshtjellje kollaroje te bardhe e ka nevoje organizata mafioze qe ka kapur partite tona politike dhe shtetin.
Përgjigju