Kombëtarja shqiptare e futbollit luan kundër Letonisë në datën 9 shtator në Tiranë (20:45), duel ky që është më shumë se i rëndësishëm për Grupin K kualifikues të Kupës së Botës.
Barazimi 0-0 në Tiranë kundër Serbisë dhe rezultati 1-1 në Riga kundër Letonisë, ka sjellë një zbehje të kërkesës për bileta. Ndryshe nga çdo sfidë tjetër e Kombëtares, dueli i radhës nuk preferohet nga tifozët dhe në shitje ka shumë bileta, paçka se FSHF ndryshe nga herët e tjera ka hapur edhe një pikë fizike për shitje.
Të dala në shitje në datën 6 gusht online, interesi i ulët bëri që FSHF t'i nxirrte në shitje fizikisht, por interesi sërish është i ulët. Diçka e tillë vjen edhe pas thirrjes së Tifozave Kuq e Zi për refuzim, të cilët janë përjashtuar nga FSHF, pas përplasjes me Federatën për bashkorganizimin e Euro 2027 për 21-vjeçarët me Serbinë.
TKZ në një reagim të fundit thotë se ky është një 'guxim kundër një federate që është kundër popullit të saj'. Si të mos mjaftonte interesi i ulët, kujtojmë se UEFA ka dënuar FSHF-në me reduktimin e 20 përqind të numrit të kapacitetit të stadiumit për sfidën kundër Letonisë, kjo për shkak të thirrjeve raciste në sfidën e shkuar me Serbinë.
"Ju falenderojmë të gjithëve për guximin dhe për angazhimin që keni bërë deri tani, për refuzimin e një federate që është kundër popullit të saj, kundër tifozëve të Kombëtares. Ky refuzim, i ka detyruar që të sponsorojnë njoftimet në rrjete sociale për ndeshjet e Kombëtares, ndërsa që pak muaj më herët biletat "avulloheshin" brenda pak orëve", shkruan TKZ, që kujton se FSHF ka sponsorizuar postimin për biletat e ndeshjes, kjo prej interesit të pakët.
Gjithsesi, fakt është që në ndeshjet me rivalë të mëdhenj interesi është shumë i madh për të parë Kombëtaren, ndërsa në ndeshje më normale ky interes zbehet.
Komente
