Ka përfunduar rikonstruksioni i rrugës që lidh qendrën e Tiranës me Kombinatin, duke lehtësuar ndjeshëm qarkullimin e automjeteve në këtë rrugë. Është vendosur infrastrukturë dhe sinjalistikë për të gjithë kalimtarët dhe drejtuesit e mjeteve.
Pasi inspektoi punimet e kryera, kryebashkiaku i Tiranës, Erion Veliaj, i shoqëruar nga deputetja e PS, Blerina Gjylameti tha se: “Janë 2.5 km që lidhin Unazën e Madhe të Tiranës me qendrën e Kombinatit, aty ku kemi mbaruar edhe investimin tjetër te varrezat e Sharrës, Vaqarrit, Pezës, Ndroqit apo ata që respektojnë të afërmit e tyre në varrezat e Tiranës”.
Investimi do të vazhdojë. “Do të vazhdojmë investimet në dyja anët e rrugës. Nga njëra anë është “Misto Mame”, ku kemi ndërhyrë në disa lagje, por do vazhdojmë si efekt domino edhe në lagjet e tjera. Kurse, në anën tjetër, është “Musine Kokalari”, e me radhë të gjitha lagjet deri në Sharrë”, theksoi kryebashkiaku Veliaj. Sipas kryebashkiakut Veliaj, shumë shpejt do të marrë zgjidhje edhe problemi i kanalizimeve, ku projekti për rregullimin e pusetave për ujërat e zeza do të ndodhë shumë shpejt, shumë e rëndësishme për higjienën e kryeqytetit.
Një lajm i mirë është edhe për personat që duan të lëvizin me biçikletë, ku në të dyja krahët do të ketë korsi për biçikletat. Gjylameti vlerësoi angazhimin e bashkisë dhe shprehu besimin se ky ndryshimi do të jetë edhe nëpër rrugica. “Sot po shohim nga afër një nga investimet më cilësore të gjithë Bashkisë së Tiranës, që i shërben jo vetëm gati 60 mijë banorëve të Kombinatit, por është edhe një rrugë hyrëse dhe dalëse për të gjithë Tiranën".
Komente
