Funerali zyrtar shtetëror në Washington, DC, për ish-presidentin Jimmy Carter do të mbahet më 9 janar, konfirmoi Shtëpia e Bardhë të hënën (30 dhjetor 2024).
Presidenti Joe Biden shpalli 9 janarin si Ditë Kombëtare Zie, disa orë pas ndarjes nga jeta të Carter-it në moshën 100-vjeçare.
“Me dhembshurinë dhe qartësinë e tij morale, ai punoi për të çrrënjosur sëmundjet, për të krijuar paqe, për të avancuar të drejtat civile dhe njerëzore, për të promovuar zgjedhje të lira dhe të ndershme, për të strehuar të pastrehët dhe për të avokuar gjithmonë për më të pambrojturit. Ai shpëtoi, ngriti dhe ndryshoi jetët e njerëzve në mbarë botën,” tha Biden për Carter-in.
Biden do të mbajë një fjalim përkujtimor në ceremoninë e funeralit të Carter-it, tha një zyrtar i Shtëpisë së Bardhë të hënën, një moment i rëndësishëm për Biden për të nderuar mikun e tij, në Katedralen Kombëtare të Washington-it, në ditët e fundit të presidencës së tij.
Ceremoni publike për të nderuar trashëgiminë e Carter-it do të mbahen në Atlanta dhe Washington, DC, të ndjekura nga një varrim privat në qytetin e lindjes së Carter-it, Plains, Georgia, sipas Qendrës Carter, megjithëse rregullimet përfundimtare janë ende në proces.
Detyrën për të organizuar ceremonitë do ta marrë Forca e Përbashkët e Detyrës-Rajoni Kombëtar i Kryeqytetit brenda Departamentit të Mbrojtjes.
Komente
