TIRANË-Është vetëdorëzuar në polici ditën e sotme Oltion Buzi, administratori i 'Buzi Store', pasi ishte shpallur në kërkim që nga muaji janar i këtij viti.
Pas një hetimi disa mujor të nisur që në vitin 2024, administratori i ‘Buzi Store’ akuzohet se nuk ka deklaruar 3.7 mln euro të ardhura në autoritetet tatimore.
Sipas Prokurorisë, Oltion Buzi përdorte një sistem të paligjshëm për lëshimin e faturave false tatimore, sistem kompjuterik i paautorizuar nga Tatimet në vend që operonte përmes një platformës online të palicencuar “store.dyqanimen.com”.
Gjatë shitjeve në bizneset e “Buzi Store” lëshoheshin faturave të falsifikuara dhe të pa fiskalizuara. Madje në hetimin e prokurorisë së Tiranës, pas referimit që i është bërë nga Drejtoria e Hetimit Tatimor, u zbulua se në disa kompani lëshonte fatura me vlera më të mëdha, ndërkohë që deklaronte një vlerë shumë më të vogël për qëllime tatimore, duke kryer kështu evazion fiskal në vlera të mëdha.
Me vendim të Gjykatës së Shkallës së Parë Tiranë, në janar të këtij viti u ushtruan kontrolle në 8 pikat e ‘Buzi Store’, si edhe në një shoqëri fiskalizimi. Si provë materiale, u sekuestruan njësi kompjuterike, telefona celularë, tableta dhe vlera monetare në valuta të ndryshme që arrijnë në 8,000,000 lekë, të cilat nuk ishin të justifikuara me dokumentacion ligjor.
Komente
