PAVIA- Mbrëmjen e 23 shtatorit, Komisariati i Policisë Pavia ekzekutoi një urdhër-arresti ndërkombëtar të lëshuar nga Shqipëria, prej Interpol Tiranës.
Oficerët u vunë në gjurmët dhe arrestuan një 34-vjeçar shqiptar që lëvizte në zonën e Milanos dhe që akuzohet për veprën penale të “rrëmbimit dhe detyrimit me qëllim të dhënies së dëshmisë së rreme”.
Ky krim parashikon një dënim të rëndë sipas Kodit Penal, i cili mund të arrijë deri në shtatë vjet burgim.
Mediat e vendit fqinj raportuan se i kërkuari u pikas teksa hynte në një lokal, në qendër të qytetit, por identiteti i tij nuk u publikua.
Pasi u izolua në ambientet e policisë, u bë edhe konfirmimi i identitetit të tij nëpërmjet gjurmëve. Pas kësaj procedure 34-vjeçari u arrestua dhe u dërgua në burgun Torre del Gallo në Pavia, ku ndodhet në dispozicion të Gjykatës së Apelit të Milanos, e cila është kompetente për verifikimin përkatës për qëllimet e ekstradimit.
Nëse masa aprovohet, Interpol Roma dhe Tirana do realizojnë edhe operacionin e ekstradimit.
