Stuhia “Ciaran” po “shkund” shumë vende të Europës me erëra tmerrësisht të forta dhe reshje shumë të dendura shiu, duke sjellë dëme të shumta materiale por fatkeqësisht dhe humbje jetësh.
Në Toskana të Italisë, për shkak të motit ektrem dhe të paprecedentë janë rregjistruar 6 viktima si dhe është raportuar për persona të zhdukur.
Viktima të kësaj stuhie janë rregjistruar edhe në Francë, Britaninë e Madhe, Belgjikën, Holandën dhe Gjermaninë.
Në Toskanë, disa banorë u raportuan të zhdukur pasi përmbytjet përfshinë gjithashtu pjesë të rajonit të njohur të pushimeve.
Disa zona regjistruan 1,9 metra reshje shiu në vetëm tre orë.
“Asnjëherë më parë nuk kemi regjistruar kaq shumë shi në kaq pak minuta”, shkroi presidenti i Toskanës, Eugenio Giani, në X, dikur Tëitter, pasi shpalli gjendjen e jashtëzakonshme dje në mëngjes.
Provinca e Pratos u godit veçanërisht rëndë pasi një lumë lokal shpërtheu brigjet e tij.
Disa spitale u përmbytën dhe stuhia i ktheu rrugët në disa fshatra në përrenj uji dhe baltë.
Shërbimi zjarrfikës u thirr për më shumë se 1 000 incidente në zonë dhe rreth 48 000 familje mbetën pa energji elektrike.
Kryeministrja italiane, Giorgia Meloni shprehu ngushëllimet e saj më të thella për viktimat në një videomesazh.
Meteorologët kanë paralajmëruar për stuhi të tjera gjatë fundjavës.
Në Francë, mbi gjysmë milioni familje ishin ende pa energji gjatë mëngjesit.
Stuhia “Ciaran” gjithashtu shkaktoi dëme në bregun jugor të Anglisë dhe Ishujt Channel.
“Rreth 150 000 familje ishin përkohësisht pa energji elektrike”, sipas agjencisë britanike të lajmeve PA, ndërsa disa pjesë të vendit ishin paralajmëruar për përmbytje të tjera.
Në Belgjikë, situata është normalizuar kryesisht pas stuhive, të cilat shkaktuan vdekjen e një fëmije dhe një personi tjetër.
