Shqiptari Taulant Malaj që vrau vajzën e tij dhe fqinjin italian pas një krize xhelozie është shkrehur në lot gjatë rimarrjes së dëshmisë dhe komunikimit të masës arrest me burg nga autoritetet italiane. Avokatët Michele Maiellaro dhe Giacomo Lattanzio folën për mediat duke thënë se teksa koha kalon autori bëhet më i vetëdijshëm për krimin që ka kryer dhe gjestet ekstreme, madje ai nuk ishte i vetëdijshëm se kishte vrarë vajzën e tij.
“Sa më shumë kalon koha, aq më shumë ai fillon të ndërgjegjësohet për atë që ka ndodhur. Ai kishte djallin në kokë ", thonë avokatët të cilët do të vlerësojnë nëse do të kërkojnë ose jo një raport psikiatrik. Hetimet e thelluara do të jenë thelbësore”, thonë ata.
“Pasditen e së dielës ai rrëfeu vrasjen e dyfishtë dhe më pas ka ngrirë në gjendje shoku. Sot në mëngjes ka dashur të bëjë të tjera deklarata por ai kishte një krisje psikologjike dhe qante i dëshpëruar për vajzën e tij”. thonë avokatët Maiellaro dhe Lattanzio.
Nuk i përballonte dot pyetjet se ishte shumë, shumë i rënduar. Po ndërgjegjësohet dalëngadalë për dramën dhe tragjedinë që ka ndodhur. Kur kanë kërkuar të merren në pyetje, ka nënvizuar se ka konfirmuar deklaratat e bëra në prokurori. Pastaj, kur filloi të shprehte dhimbjen e tij, u ngec në një gjendje shoku dhe nuk mund të vazhdonte më.
Avokati Giacomo Lattanzio siguroi nga pamjet që kanë parë se fëmija 5- vjeç nuk ishte fshehur pas një divani dhe se Taulant Malaj nuk ka bërë asnjë gjest agresionin ndaj djalit duke hedhur poshtë çfarë u raportua për fshehjen të vogëlushit.
"Ai nuk u sulmua. Deri më sot nuk jemi në gjendje të kuptojmë arsyet e tragjedisë", përfundoi Avokati Giacomo Lattanzio. Ndërsa shqiptari i arrestuar ka konfirmuar në këtë marrje në pyetje deklaratën e bërë pas arrestimit dhe arsyen e kryerjes së krimit. Paraditen e së enjtes është caktuar të bëhet autopsia e trupave të 2 viktimave.
Taulant Malaj kreu krimin e rëndë pas dyshimeve se gruaja e tij kishte një lidhje intime me fqinjin De Santis dhe për këtë thotë se ka video nga kamerat brenda shtëpisë të takimeve dhe drekave mes tyre, madje një herë De Santis ka marrë Teftën me makinën e tij Masserati. Ndërsa nga shtrati i spitalit Tefta Malaj sipas mediave italiane ka thënë se do të shohë përsëri fëmijët dhe po ashtu citohet të jetë shprehur se burri i saj Taulant Malaj mendoi se ajo kishte vdekur pasi e qëlloi 6 herë me thikë. Ndërsa gruaja 39 vjeçe për shkak të kushteve të saj shëndetësore do të merret në pyetje të premten kur mendohet se mund të jetë qetësuar pasi është ende e shokuar.
Djali 5 vjeç i çiftit që tashmë qendron tek dajat ka kërkuar nënën dhe motrën e tij por jo babain. I mituri gjatë skenës horror të krimit ishte fshehur pas divanit aty ku edhe e gjeti policia. Tezja e 5-vjeçarit teksa ka folur për agjencinë e lajmeve ANSA thotë se të miturit i mungon shumë nëna e tij dhe ata i thonë se do të kthehet së shpejti. Të afërmit kërkojnë ta shpërqendrojnë duke I blerë lodra dhe ofruar argëtime të tjera. Mesazhe solidariteti vijnë nga të tjerë qytetarë nëna në Itali që kanë pasur një histori të ngjashme me Tefta Malaj. Ato i shkruajnë letra duke i thënë se duhet të jetojë për fëmijën e saj.
Detaje të reja kanë dalë në dritë nga krimi i rëndë në Itali, ku Taulant Malaj ka qëlluar për vdekje vajzën e tij 16-vjeçare dhe italianin me të cilin dyshonte se e tradhtonte gruaja. Që të dielën ndodhet pas hekurave dhe në rrëfimin e tij, ka folur edhe për takimet e gruas Tefta me italianin Massimo.
Sipas tij, të dy konsumonin shumë shpesh drekën bashkë dhe thotë se këto momente i ka regjistruar me celular.
“Një ditë, ai mori gruan time me Maserati-n e tij”, rrëfeu Taulanti.
I fiksuar pas xhelozisë së gruas, vrau italianin me teh celësi dhe më pas shkoi t’i merrte jetën 39-vjeçares me të cilën ka 2 fëmijë. Në tentativë për të vrarë gruan, i doli para vajza 16-vjeçare të cilën e qëlloi me thikë duke i shkaktuar vdekjen.
Për djalin 5 vjeçar që ishte fshehur prapa divanit, Taulanti tha se e kishte parë, por e kurseu dhe shpëtoi pa u lënduar. Ai është marrë nga dajat ndërsa Tefta po merr trajtim mjekësor në spital. Sot, Taulant Malaj pritet të dalë para gjykatës.
Dinamika e ngjarjes sipas dëshmisë së gruas:
Tek po zbardhte e diela, Tefta dhe Taulanti ishin të dy në shtrat, të gjithë po flinin. Zakonisht Taulanti punonte natën si bukëpjekës por atë natë fatzeze, ishte pushim. Në një moment ai ngrihet papritur dhe del nga shtëpia (banonin në katin e parë). Ai maskaron me teh çelësi 20 herë Massimo De Santis, fqinjin e tyre në katin e tretë për të cilin dyshonte se e tradhtonte gruaja.
Vrasja e italianit nuk e kënaqi, si xhelat i shtëpisë së tij ai hyn në banesë dhe tenton të zhdukë të parin djalin e tij por nuk ja del, Tefta i del përballë dhe goditet disa herë me thikë. Me të njëjtin guxim ndërhyn për të mbrojtur të ëmën edhe e bija, Xhesika, e cila u kthye në viktimën e çmendurisë së të atit. Në përpjekje për të shpëtuar të birin 5-vjeçar ajo e fsheh mbrapa divanit, me disa batanije, fati i tij ishte gjendja e shokut, sepse vetëm ashtu ai arriti t’i shpëtonte vdekjes, sipas saj.
Teksa kryente aktin, Tefta e filmonte për t’ia treguar policisë, por në sinkron me të ishte dhe vetë xhelati i tyre. Ai i xhiroi teksa i vriste dhe ja çoi dikujt, që në fakt gruaja e dyshon si bashkëpunëtor të tij.
Report Tv shkoi në Selenicë dhe Babicë të Vlorës, në vendlindjet e dy protagonistëve Tefta dhe Taulant Malaj. Fqinjët i cilësuan si familje të mirë ndërsa rrëfyen se kanë emigruar drejt Italisë që prej vitit 1997 duke mos u kthyer përveçse njëherë në fshat.
