Itali- Një 57-vjeçar me dy identitete është arrestuar në Lushnjë (Fier) pas bashkëpunimit të policisë italiane dhe asaj shqiptare, teksa kërkohej prej 16 vitesh si drejtues i një organizate kriminale të narkotrafikut në Caserta të Napolit.
I arrestuari është Bardhyl Haxhiu, allias Fatbardh Haxhiu, i dënuar në mungesë me 24 vjet burg për trafik ndërkombëtar droge. Lajmin e konfirmoi sot (30 prill) edhe Policia e Shtetit, pas finalizimit të operacionit të koduar "Operacionalja 42".
Burri kishte qenë në arrati që nga viti 2008 dhe ishte marrësi i një urdhri për zbatimin e dënimit të lëshuar nga Zyra e Prokurorit të Përgjithshëm në Gjykatën e Apelit të Napolit.
“Sipas asaj që u konstatua gjatë hetimeve, Haxhiu dyshohet se ishte pjesë e një organizate kriminale aktive midis provincave të Napolit dhe Kazertës, e dedikuar për importimin e heroinës nga jashtë. Brenda grupit, burri konsiderohej kontakti kryesor për hyrjen në Itali të dërgesave të mëdha të drogës, për sasi që tejkalonin edhe 130 kilogramë”, informon media italiane.
Arrestimi i tij u bë i mundur falë bashkëpunimit midis njësisë hetimore të Karabinierëve të Napolit dhe autoriteteve policore shqiptare, mbi bazën e kërkimeve ndërkombëtare të aktivizuara nga Prokuroria e Përgjithshme e Napolit.
Ai aktualisht po mbahet në burg në Shqipëri, në pritje të procedurave të ekstradimit.
Njoftimi i Policisë së Shtetit:
"Finalizohet nga Drejtoria e Forcës së Posaçme Operacionale, operacioni policor i koduar “Operacionalja 42”. I dënuar nga autoritetet italiane, me 24 vjet burgim, si pjesëtar i një organizate kriminale që trafikonte lëndë narkotike, kapet në Lushnjë, 57-vjeçari.
Si rezultat i koordinimit të punës dhe shkëmbimit të informacioneve, me partnerët italianë, nëpërmjet strukturave homologe Interpol Tirana dhe Interpol Roma, shërbimet e Drejtorisë së Forcës së Posaçme Operacionale, në kuadër të operacionit “Operacionalja 42”, lokalizuan në Lushnjë, kapën dhe vunë në pranga, me qëllim ekstradimin në Itali, shtetasin:Fatbardh Haxhiu alias Bardhyl Haxhiu, 57 vjeç, banues në Lushnjë.
Ky shtetas ishte në kërkim ndërkombëtar nga Interpol Roma, pasi Gjykata e Apelit e Napolit, Itali, në vitin 2008, e ka dënuar me 24 vjet burgim, për veprën penale "Organizata kriminale me qëllim trafikimin e lëndëve narkotike". Ky shtetas, në bashkëpunim me shtetas të tjerë shqiptarë, ka trafikuan sasi kokaine 15-130 kg, në Caserta, Itali. Interpol Tirana po bashkëpunon me homologët në Romë, për të finalizuar ekstradimin e këtij shtetasi, në Itali".
Komente
