Sulmet ushtarake izraelite vranë të paktën 50 palestinezë në të gjithë Rripin e Gazës të mërkurën, thanë autoritetet lokale të shëndetësisë, në një përshkallëzim të ndjeshëm të bombardimeve ndërsa Presidenti i SHBA-së Donald Trump vazhdoi vizitën e tij në Lindjen e Mesme. Pjesa më e madhe e viktimave ishin kryesisht gra dhe fëmijë.
Raportet e shtypit izraelit cituan zyrtarë të sigurisë duke nënvizuar se udhëheqësi ushtarak i Hamasit, Mohammad Sinwar, dhe zyrtarë të tjerë të lartë ishin vrarë në një sulm të martën ndaj asaj që ushtria izraelite e përshkroi si një bunker komande dhe kontrolli nën Spitalin Evropian në qytetin jugor të Khan Younis. Pak para se të fillonin sulmet izraelite, ushtria lëshoi urdhra evakuimi për banorët në zonën e Jabalia dhe Beit Lahiya.
Përshkallëzimi i situatës nga ana e Izraelit erdhi kundër shpresave të palestinezëve se vizita e Trump mund të ushtrojë presion për një ulje të sulmeve. Hamasi të hënën liroi Edan Alexander, pengun e fundit amerikan të gjallë, përpara udhëtimit të Trump.
Duke folur në Riad të martën, Trump u shpreh se populli i Gazës meritonte një të ardhme më të mirë.
Përpjekjet për të rënë dakord për një armëpushim kanë dështuar në javët e fundit, me Hamasin dhe Izraelin.
SHBA-të kanë paraqitur gjithashtu një plan për të rihapur shpërndarjen e ndihmës humanitare në Gaza duke përdorur kontraktorë privatë. Izraeli, i cili vendosi një bllokadë totale të furnizimeve që hyjnë në Gaza që nga 2 marsi, e ka miratuar planin. Por ai është refuzuar nga Kombet e Bashkuara dhe agjencitë ndërkombëtare të ndihmës dhe detajet kryesore, duke përfshirë financimin dhe donatorët, mbeten të paqarta.
Izraeli filloi pushtimin e Gazës në hakmarrje për sulmin e udhëhequr nga Hamasi ndaj komuniteteve në Izraelin jugor më 7 tetor 2023, që vrau rreth 1,200 njerëz, sipas të dhënave izraelite.
Bombardimet izraelite kanë vrarë më shumë se 52,900 palestinezë. Popullsia e saj prej rreth 2.3 milionë banorësh është në prag të urisë, sipas grupeve të ndihmës dhe agjencive ndërkombëtare/Reuters
Komente
