Ministri izraelit i Mbrojtjes, Israel Katz ka njoftuar zgjerimin e operacionit ushtarak në Gaza, duke thënë se zona të mëdha të enklavës do t’i shtohen zonave të sigurisë së Izraelit, raporton Reuters. Ai paralajmëroi evakuim në shkallë të gjerë të popullsisë nga zonat ku ka luftime ndërsa iu kërkoi banorëve që të eliminojnë Hamasin, dhe të kthejnë pengjet izraelite si e vetmja mënyrë për t’i dhënë fund luftës.
Në të njëjtën kohë, liderët izraelitë kanë thënë se planifikojnë të lehtësojnë largimin vullnetar të palestinezëve nga enklava, pasi presidenti amerikan Donald Trump bëri thirrje që ajo të evakuohet dhe të rizhvillohet si një vendpushim bregdetar nën kontrollin e Shteteve të Bashkuara të Amerikës.
Izraeli rifilloi sulmet ajrore në Gaza dhe dërgoi trupat tokësore përsëri në këtë muaj, pas dy muajsh qetësie relative pas përfundimit të një armëpushimi të mbështetur nga SHBA që lejoi shkëmbimin e disa pengjeve të mbajtura nga Hamasi në këmbim të të burgosurve palestinezë në burgjet e Izraelit.
Përpjekjet e udhëhequra nga ndërmjetësuesit e Katarit dhe Egjiptit për t’i kthyer bisedimet në rrugën e duhur që synonin t’i jepnin fund luftës nuk kanë arritur në një përparim.
Komente
