"Java e Gjuhës Italiane" u përmbyll në kalanë e Beratit me një koncert të fituesit të Sanremos Antonio Maggios, shoqëruar në kitarë nga Ettore Giannì.
Ky aktivitet u organizua nga Konsullata italiane e Vlorës në bashkëpunim me Bashkinë e Beratit, dhe synon të promovojë gjuhën dhe kulturën italiane.
Të pranishmit në këtë event kanë mundur të shijojnë për rreth një orë muzikën italiane por nuk kanë munguar as performanca e fëmijëve të shkollës 9-vjeçare "Ylli i Mëngjesit" që kanë recituar e kënduar në gjuhën italiane.
Konsullja e Përgjithshme italiane në Vlorë, Iva Palmieri ka theksuar se "Java Italiane" ka për qëllim të promovojë gjuhën dhe kulturën italiane dhe organizohet në një sërë vendesh.
Ndërsa kryebashkiaku i Beratit, Ervin Demo tha se për beratasit gjuha italiane ka qenë prej vitesh si gjuhë e parë.
“Java e Gjuhës Italiane” organizohet nga Ministria e Jashtme e Italisë, përmes Konsullatës së Përgjithshme në Vlorë dhe Institutit Italian të Kulturës në Tiranë dhe e ka zanafillën e saj në vitin 2001.
SI.E.//ReportTv.al