Israa Ghrayen, një 21-vjeçare palestineze, u vra të enjten nga vëllai i saj për të ruajtur nderin e familjes. Ihab, vëllai i Israa, e dhunoi dhe e torturoi të renë në shtëpinë e familjes në Bethlehem pasi ajo postoi në rrjetet sociale një video ku shfaqej me të fejuarin e saj.
Sipas Jerusalem Post, Ihab u nevrikos nga postimi, pasi sipas tij, çnderoi familjen duke dalë publikisht me burrin me të cilin do të martohej. Ihab u urdhërua nga i ati të rrihte të motrën pasi të afërm të tyre panë videon online.
Gjatë përleshjes. Israa tentoi të arratisej dhe ra nga kati i dytë i shtëpisë, duke pësuar dëmtime serioze në shtyllën kurrizore. Pa përcaktuar çfarë ndodhi, Israa tha në Instagram se s’do të punonte dot për dy muajt e ardhshëm pasi do të operohej.
“Jam e fortë dhe kam dëshirë të jetoj, nëse s’do ta kisha këtë dëshirë, do të kisha vdekur dje. Mos më dërgoni mesazhe ku më thoni se duhet të tregohem e fortë. Unë jam e fortë. I gjykoftë Zoti ata që duan të më shtypin e të më lëndojnë.” tha Isra.
Israa u sulmua për herë të dytë në spital. U postuan video online ku ajo dëgjohet të bërtasë e të kërkojë ndihmë. Familja mohon fajin dhe insistojnë se Israa vdiq nga një atak kardiak. Autoritetet palestineze nuk kanë komentuar mbi ngjarjen. “Israa u vra nga familja e saj pasi postoi një video me të fejuarin e saj.
Krimin po e quajnë ‘vrasje për nder,’ por kjo është e gabuar dhe e pavërtetë. Vrasjet nuk kanë nder,” tha në një deklaratë për shtyp organizata jo-fitimprurëse palestineze Adalah.
Miqtë e vajzës thonë se ajo u dhunua për vdekje nga familjarët e vet, kurse disa llogari në rrjetet sociale u shprehën se vdiq në shtëpi pasi u sulmua në spital.
“Kur dëgjova ç’i ndodhi Israa-s, u tmerrova. Jetoj me familjen dhe jam e lirë të shkoj ku të dua, por po sikur dikush të përhapë thashetheme për mua? Do më vrasin dhe mua?” ,tha Qamar al-Masri, një shoqe gjimnazi e viktimës.
Online qarkullon #WeAreAllIsraah,Jemi të gjithë Israa dhe me qindra njerëz po kërkojnë arrestimin e vëllait të Israa nga qeveria kanadeze, pasi ai banon në Kanada.
Sipas Jerusalem Post, palestinezët në Bregun Perëndimor kanë organizuar një protestë në sheshin e Bethlehem që kërkon kriminalizimin e këtyre veprave dhe sensibilizimin e masave mbi çështjen.
Sipas mbështetësve të saj, Israa respektonte protokollin shoqëror. U fejua me miratimin e familjes, shoqërohej nga një i tretë në çdo takim me të fejuarin dhe mbante hixhab.
Komente
