Juan Cuadrado largohet nga Juventusi pas tetë vitesh dhe 11 trofeve të fituar. Kanë qenë bardhezinjtë që kanë konfirmuar largimin, duke treguar edhe të gjithë koleksionin e numrave që kolumbiani arriti te Juvja, duke marrë edhe shiritin e kapitenit.
"314 herë kemi luftuar së bashku, duke fituar 11 trofe. 26 herë e kemi parë të gëzohet, me kërcimin e tij të pagabueshëm. 59 herë ishte ai që u dha gëzimin e golave shokëve të tij. Sot, pas një udhëtimi prej tetë sezonesh, është koha për të thënë lamtumirë. Juan Cuadrado largohet nga Juventusi. Kanë qenë tetë vite të pasura, të veçanta, të paharrueshme . Vit pas viti, "Panita" ka qenë një nga siguritë nga e cila do të fillojë sërish", njofton Juve.
Frymëzim brenda dhe jashtë fushe, kështu shkruajnë bardhezinjtë për 35-vjeçarin.
"Në çdo pozicion, me çdo formë, me çdo numër mbi shpinë. Kanë qenë tetë vite plot gëzime, rritje të vazhdueshme dhe punë të përditshme, por edhe buzëqeshje, energji pozitive të sjellë në dhomat e zhveshjes dhe në botën tonë, me kërcime, shaka dhe entuziazëm . Kështu Juan pushtoi tifozët, në një mënyrë unike dhe të veçantë, duke u bërë frymëzim brenda dhe jashtë fushës", shkruan Juve.
