Në një shesh të tejmbushur me rreth 1 milion të rinj pelegrinë nga e gjithë bota, Papa Leon XIV përshëndeti në Tor Vergata të Romës mbrëmjen e sotme (2 gusht), Jubileun e të Rinjve 2025 dhe dha përveç mesazheve të paqes, edhe disa këshilla të vlefshme.
Ai i sugjeroi të rinjtë që të kërkonin të vërtetën me pasoion dhe të kishin kujdes nga interneti dhe rrjetet sociale, në paqartësitë që ato u sjellin.
Papa përshkoi sheshin i përshëndetur nga të rinjtë e pranishëm teksa mbajti mbi shpinë edhe kryqin në Vigjiljen e Lutjes, informon "Corriere".
Në shesh ishin të rinj nga 146 vende të botës:
"Jemi pothuajse një milion. Të dashur të rinj, ne mblidhemi në dritën e mbrëmjes që po afron", tha kreu i Vatikanit dhe Selisë së Shenjtë.
Papa mbërriti me një helikopter teksa zbriti në Tor Vergata, teksa ma tej përshëndeti të rinjtë hap pas hapi.
"Guximi për të zgjedhur vjen nga dashuria."
"Zgjedhja është një akt themelor njerëzor. Duke e vëzhguar me kujdes, ne e kuptojmë se nuk ka të bëjë vetëm me zgjedhjen e diçkaje, por me zgjedhjen e dikujt. Kur zgjedhim, në një kuptim të thellë, ne vendosim se kush duam të bëhemi".
Kështu u shpreh Papa Leon XIV në përgjigje të pyetjes së një vajze italiane në lidhje me "guximin për të zgjedhur".
"Të dashur të rinj, ne mësojmë të zgjedhim përmes sprovave të jetës, dhe para së gjithash duke kujtuar se ishim të zgjedhur. Kjo kujtesë duhet të eksplorohet dhe kultivohet. Ne e morëm jetën lirisht, pa e zgjedhur atë!" shtoi Leo. "Në origjinën e vetes sonë nuk kishte një vendim të yni, por një dashuri. Guximi për të zgjedhur vjen nga dashuria, të cilën Zoti na e shfaq në Krishtin. Është Ai që na deshi me gjithë vetveten, duke shpëtuar botën dhe duke na treguar kështu se dhurata e jetës është rruga për të përmbushur personin tonë”, vazhdoi ai.
"Kini kujdes nga paqartësitë e internetit dhe mediave sociale"
Interneti dhe mediat sociale janë një mundësi për dialog dhe takim, por kini kujdes nga paqartësia e tyre.
Papa Leon XIV, në dialogun e tij me të rinjtë, theksoi iluzionin e rrjeteve sociale, duke cituar (në spanjisht) fjalët e paraardhësit të tij Françeskut, i cili theksoi se si interneti dhe media janë "bërë 'një mundësi e jashtëzakonshme për dialog, takim dhe shkëmbim midis njerëzve, si dhe për qasje në informacion dhe njohuri'".
"Megjithatë, këto mjete bëhen të paqarta", specifikoi Papa, "kur ato dominohen nga logjika dhe interesat tregtare që prishin marrëdhëniet tona në një mijë raste të papritura". "Meqë ra fjala, Papa Françesku kujtoi se ndonjëherë 'mekanizmat e komunikimit, reklamimit dhe rrjeteve sociale mund të përdoren për të na bërë subjekte të përgjumura, të varura nga konsumi'", vazhdoi ai.
Dhe teksa vijoi këshillat, ndau mendimin se:
"Pastaj marrëdhëniet tona bëhen të ngatërruara, të pezulluara ose të paqëndrueshme. Kur mjeti dominon njeriun, njeriu bëhet një instrument: po, një instrument tregu, një mall më vete. Vetëm marrëdhëniet e sinqerta dhe lidhjet e qëndrueshme nxisin histori të jetës së mirë", shtoi Papa Leon.
Lidhur me temën e miqësisë, ai citoi Shën Agustinin.
Papa të rinjve: Kërkoni të vërtetën me pasion!
Në dialogun e tij me të rinjtë që merrnin pjesë në vigjilje në Tor Vergata, Papa Leon XIV iu përgjigj një pyetjeje në lidhje me miqësinë, e bërë nga një grua e re meksikane.
Papa theksoi (në spanjisht) se:
"Kultura luan një rol themelor: është kodi me të cilin ne interpretojmë veten dhe botën. Ashtu si një fjalor, çdo kulturë përmban fjalë si fisnike ashtu edhe vulgare, si vlera ashtu edhe gabime, të cilat duhet të mësojmë t'i njohim. Duke kërkuar me pasion të vërtetën".
Dhe në fund shtoi:
"Ne jo vetëm që marrim një kulturë, por e transformojmë atë përmes zgjedhjeve të jetës. E vërteta, në fakt, është një lidhje që bashkon fjalët me gjërat, emrat me fytyrat. Gënjeshtrat, nga ana tjetër, i ndajnë këto aspekte, duke gjeneruar konfuzion dhe keqkuptime".
Komente
