Real Madridi është pranë finalizimit të transferimit të mbrojtësit të talentuar Dean Huijsen. Sipas mediave spanjolle, 20-vjeçari pritet t’i nënshtrohet vizitave mjekësore brenda kësaj jave, pasi tashmë ka arritur një marrëveshje personale me "Galaktikët".
Bournemouth, klubi që zotëron kartonin e lojtarit, ka dhënë miratimin për lëvizjen duke lejuar Huijsen të fluturojë drejt Madridit sapo të përmbyllen detajet finale të marrëveshjes. Palët kanë nisur shkëmbimin e dokumenteve, pasi një akord për pagesën e klauzolës prej 60 milionë eurosh është arritur ditën e djeshme.
Klauzola do të shlyhet nga Real Madridi në një periudhë tre vjeçare dhe zyrtarizimi i transferimit pritet të ndodhë në ditët e ardhshme.
Dean Huijsen iu bashkua Bournemouthit vitin e kaluar nga Juventusi për një shumë prej 15.2 milionë eurosh. Më herët, ai ka qenë pjesë e Romës në huazim dhe është formuar në akademitë e Juventusit dhe Malagas.
Në sezonin aktual, mbrojtësi ka zhvilluar 34 ndeshje në të gjitha garat, duke realizuar tre gola dhe dhënë një asistim. Performancat e tij kanë tërhequr vëmendjen e gjigantëve europianë dhe ai tashmë pritet të bëhet pjesë e projektit afatgjatë të Real Madridit.
Huijsen debutoi për kombëtaren e Spanjës dy muaj më parë dhe deri tani ka grumbulluar dy paraqitje, duke u konsideruar si një nga talentet më premtues të mbrojtjes spanjolle.
Komente
