Kalimi në rrugën Kukës-Shishtavec vijon të jetë tepër i vështirë, për shkak se askush nuk po e mirëmban e ajo po shkatërrohet çdo ditë e më tepër. Për më tepër, reshjet e shiut të ditës së sotme kanë shkaktuar edhe rrëshqitje dherash e gurësh.
Segmenti prej 27 kilometrash i kësaj rruge nuk është përfshirë në tenderin për mirëmbajtje dimërore, ndonëse ky segment i ka kaluar Bashkisë Kukës për këtë qëllim që nga dhjetori i 2017-s. Bashkia Kukës, nga mungesa e kapaciteteve dhe fondeve, nuk e përballon dot mirëmbajtjen. Ajo ka trokitur në çdo institucion për proçedurën e kësaj rruge, por përpjekjet nuk kanë marrë asnjëherë zgjidhje.
Rrëshqitjet e dherave dhe gurëve në këtë aks nacional rrugor janë të shpeshta dhe ndodhin edhe për shkak të relievit të thyer. Aktualisht, Kukësi është përfshirë prej tre ditësh nga reshjet e shiut dhe ato të borës. Në lartësitë mbi 800 metra, trashësia ka arritur në 4 deri në 8 centimetra. Deri më tani nuk raportohen probleme që kanë të bëjnë me situata të mundshme për rrugët, energjinë elektrike apo ujin e pijshëm.
Komente
