TIRANË- Seanca gjyqësore për shqyrtimin e padisë ndaj Byrosë Kombëtare të Hetimit ishte parashikuar të zhvillohej sot në Gjykatën Administrative, por mungesa e gjyqtares Elda Vrioni ka bërë që të mos zhvillohet.
Gjyqtarja Vrioni është e infektuar me COVID dhe është në izolim. Në sallë mungonte edhe pala paditëse, e cila përfaqësohet nga një prej kandidatëve garues për hetuesi i BKH, i cili është ankuar ndaj Komisionit të Vlerësimit dhe drejtueses së këtij institucioni për shpërdorim detyre dhe falsifikim dokumentesh. Paditësi u skualifikua nga gara pasi nuk kaloi testin fizik.
Në Gjykatën Administrative do të shqyrtohen edhe 3 paditë e kandidatëve te tjerë që u skualifikuan nga gara për BKH.
Kujtojmë se pas ankesave të ardhura nga kandidatët, Byroja Kombëtare e Hetimit ka rishikuar edhe njëherë përgjigjet, ku rezultoi se një kandidat është skualifikuar padrejtësisht. Sipas BKH-së skualifikimi i kandidatit erdhi si pasojë e një gabimi njerëzor, teksa shtojnë se do të rikthehet në garë.
