Pandemia ka marrë fund. Kështu deklaroi presidenti i SHBA-së Joe Biden gjatë një interviste të dielën, edhe pse bota vazhdon të përballet me infeksionet e COVID-19 të cilat shkaktojnë ende edhe vdekje.
"Pandemia ka mbaruar," tha Biden në intervistën e zhvilluar me programin "60 Minutes" të CBS-së.
"Ne kemi ende një problem me COVID. Ne jemi ende duke bërë shumë punë për të. Por pandemia ka mbaruar. Nëse vini re, askush nuk mban maska. Të gjithë duket se janë në formë mjaft të mirë. Dhe kështu mendoj se po ndryshon, shtoi ai.
Numri i infeksioneve me COVID-19 është zvogëluar ndjeshëm që nga fillimi i mandatit të Bidenit, kur më shumë se 3,000 amerikanë po vdisnin në ditë, pasi kujdesi i shtuar, ilaçet dhe vaksinimet janë bërë më të disponueshme, por edhe është krijuar imunitet natyral pas infeksioneve të shumta.
Por gati 400 njerëz në ditë vazhdojnë të vdesin nga COVID-19 në Shtetet e Bashkuara, sipas Qendrave të SHBA-së për Kontrollin dhe Parandalimin e Sëmundjeve.
Biden kaloi më shumë se dy javë i izoluar në Shtëpinë e Bardhë, pasi u infektua dy herë me COVID-19, duke filluar nga korriku. Gruaja e tij Jill u infektua me virusin në gusht. Biden thotë se rastet e lehta janë dëshmi e përmirësimit të masave gjatë presidencës së tij.
