Policia ka arrestuar 3 të rinj, ditën e sotme, pasi dyshohet se 2 prej tyre shpërndanin kanabis, ndërsa tjetri ka shkelur masën e sigurimit personal "Arrest në shtëpi".
Shërbimet e Komisariatit të Policisë Nr. 5, kanë organizuar dhe finalizuar operacionin policor të koduar “Doses", ku si rezultat i këtij operacioni, u arrestuan në flagrancë shtetasit K. H., 18 vjeç, L. K., 18 vjeç dhe një i mitur 17 vjeç.
Policia bënë me dije se nga kontrolli ka sekuestruar dozat me lëndë të dyshuar narkotike kanabis, gati për shitje.
“Shërbimet e Policisë kanë konstatuar në Bathore tre shtetasit e lartpërmendur dhe gjatë kontrollit fizik të 17-vjeçarit dhe shtetasit K. H., iu gjetën dhe sekuestruan, në cilësinë e provës materiale, doza me lëndë të dyshuar narkotike kanabis, gati për shitje. Nga veprimet hetimore ka rezultuar se këta shtetas, pasi siguronin lëndë narkotike konabis, e shisnin në doza, në zonën e Kamzës. Pas verifikimeve të kryera ka rezultuar se shtetasi L. K., kishte shkelur masën e sigurimit personal "Arrest në shtëpi", njoftoi sot policia.
Materialet i kaluan Prokurorisë.
