Kamëz-Një shpërthim ka ndodhur ditën e sotme në një godinë të përshtatur si studio muzikore në Kamëz. Ngjarja ka ndodhur rreth orës 03:30 të mëngjesit në rrugën Arben Broci.
Sipas burimeve të Report Tv, studio është në pronësi të Astrit Allaraj, ndërsa nuk kishte pasur njeri brenda në momentin e ngjarjes, pasi Allaraj ndodhej tek familjarët në Itali dhe nuk është mundur të merret në pyetje. Nga shpërthimi ka dëme të vogla materiale.
‘Më datë 17.11.2024, rreth orës 03:30, në rrugën "Arben Broci", në shkallët e jashtme të një godine të përshatur si studio muzikore, në pronësi të shtetasit Astrit Allaraj, është dëgjuar një shpërthim, i ngjashëm me lëndët plasëse ose lëndët piroteknike. Si pasojë ka vetëm dëme materiale (janë dëmtuar pllakat e mermerit dhe xhamat)’, njoftoi sot policia.
Grupi hetimor po vazhdon punën për sqarimin e rrethanave të ngjarjes.
