KANADA-Mark Carney ka fituar garën për të marrë drejtimin e Partisë Liberale të Kanadasë, duke hapur rrugën për ta pasuar Justin Trudeau si kryeministër në zgjedhjet e ardhshme federale. Ish-guvernatori i Bankës Qendrore të Kanadasë dhe më pas i Bankës së Anglisë, Carney fitoi me një shumicë dërrmuese, duke marrë 85.9% të votave nga rreth 152,000 anëtarë të partisë.
Ai mposhti tre rivalë në këtë garë, përfshirë edhe figurën e njohur politike Chrystia Freeland, ish-zëvendëskryeministre dhe ministre e Financave.
Carney pritet të udhëheqë Partinë Liberale në zgjedhjet federale që duhet të mbahen përpara datës 20 tetor. Ai do të përballet me sfidë të fortë nga Partia Konservatore, e cila aktualisht kryeson në sondazhe.
Në fjalimin e tij pas fitores, Carney dha mesazhe të forta për të ardhmen e vendit. Ai theksoi se Kanadaja ka nevojë për një "ekonomi të re" dhe për "marrëdhënie të reja tregtare", duke theksuar se qeveria e tij do të mbajë tarifat në fuqi derisa, sipas tij, Shtetet e Bashkuara të tregojnë respekt ndaj Kanadasë, raporton CNN.
“Amerikanët duan burimet tona, ujin dhe tokën tonë,” u shpreh Carney. “Nëse ia dalin, do të na shkatërrojnë mënyrën e jetesës. Kanadaja nuk do të bëhet kurrë pjesë e SHBA-së. Ne jemi një mozaik, jo një kazan shkrirës si Amerika.”
Ai paralajmëroi gjithashtu se ky është një moment vendimtar për të ardhmen e vendit:
“Demokracia, liria dhe vetë Kanadaja nuk janë të garantuara. Duhet të luftojmë për to.”
Fitorja e Carney vjen në një kohë kur vendi po përballet me tensione të larta politike dhe një përplasje tregtare me Shtetet e Bashkuara, në kohën kur Donald Trump pritet të rikthehet në skenën ndërkombëtare.
Në fund të fjalës së tij, Carney u shpreh se dikush po përpiqet të dëmtojë ekonominë kanadeze, duke iu referuar në mënyrë të nënkuptuar presidentit amerikan Trump.
Komente
