Policia e Matit ka ekzekutuar vendimin e Gjykatës së Apelit Tiranë, e cila vendosi ndryshimin e masave të sigurisë nga ‘arresth shtëpie’ në ‘arrest me burg’ për Agim Kolecin, Besmir Kolecin, Afrim Haspepan, Gazmir Xheçuka, të cilët akuzohen për kultivim të bimëve narkotike.
Mësohet se dy persona janë në kërkim nga autoritetet. Më konkretisht bëhet fjalë për personat me inicialet A.K., G.K., të cilët nuk u gjetën në banesën e tyre.
Sakaq, blutë e Matit kanë vënë në pranga edhe një 35-vjeçar të identifikuar si Tauland Sinani. Mësohet se ky i fundit ka dhunuar bashkëjetuesen e tij, me shtetësi greke.
Njoftimi i Policisë
Ekzekutohen 4 masa sigurie ‘Arrest në burg’, në kuadër të operacionit policor “Kepi i Vozajve”. Shërbimet e Komisariatit të Policisë Mat, ekzekutuan 4 masa sigurie të lëshuara nga Gjykata e Apelit Tiranë, e cila pas hetimeve të thelluara në kuadër të operacionit “Kepi i Vozajve”, ka vendosur ndryshimin e masave të sigurisë për shtetasit A.K., B. K., A. H., G. XH., nga ‘Arrest në shtëpi’, në ‘Arrest në burg’, për veprën penale “Kultivimi i bimëve narkotike”. Gjithashtu është bërë shpallja në kërkim dhe po punohet për kapjen e shtetasve A.K., dhe G. K., të cilët kanë qenë me masë sigurie ‘Arrest në shtëpi’, dhe gjatë kontrollit të ushtruar nga shërbimet e policisë për ekzekutimin e ndryshimit të masës së sigurisë, nuk janë gjetur në banesë. Materialet procedurale iu referuan Prokurorisë Pranë Gjykatës së Shkallës Parë Mat për veprime të mëtejshme.
---
Ushtroi dhunë fizike dhe kanosi për jetën bashkëjetuesen e tij, kapet dhe ndalohet 35-vjeçari. Nga specialistët për Hetimin e Krimit në Komisariatin e Policisë Mat, u bë kapja dhe ndalimi i shtetasit T. S., 35 vjeç, banues në Klos,Mat pasi në banesë ka ushtruar dhunë fizike dhe ka kanosur për jetën bashkëjetuesen tij A. V., (shtetase greke). Si pasojë e dhunës shtetasja A. V., ka tentuar vetëvrasjen duke konsumuar medikamente helmuese e cila po trajtohet me ndihmë mjekësore në spital në Tiranë. Materialet procedurale në ngarkim të shtetasit T. S., i kaluan Prokurorisë pranë Gjykatës së Shkallës së Parë Mat, për veprat penale "Dhunë në familje", "Shkaktim i vetëvrasjes", mbetur në tentativë.
