“Këlliçi denoncon presionin e Veliajt ndaj Drejtësisë, por është ai që bën presion mbi SPAK për të hetuar gazetarë”. Kështu e komentoi sot gazetari Carlo Bollino në Report TV sulmin e radhës nga kandidati i PD-së, Belind Këlliçi.
I intervistuar nga gazetari Arbër Hitaj, Bollino deklaroi se: “Këlliçi ka abuzuar edhe një herë me emrin tim, këtë herë përmes përgjimeve nga burgu të Erion Veliajt, të publikuara nga disa media opozitare, ku unë përmendem në mënyrë periferike. Përgjimet tregojnë se unë thjesht kam bërë punën time si gazetar, dhe vetëm në regjime diktatoriale gazetarët etiketohen si kriminelë kur botojnë intervista. Aty përmendem si gazetar dhe asgjë tjetër. Opozita e ka përmbysur realitetin dhe e interpreton rolin e gazetarit si rol kriminal.
Këlliçi ka shkuar edhe më tej. Në përgjimet e publikuara pretendohet që Erion Veliaj më ka përdorur mua dhe disa media të tjera për të bërë presion ndaj drejtësisë. Ndërkohë, është vetë Këlliçi që me një deklaratë zyrtare të Partisë Demokratike ushtron presion mbi SPAK-un për të më hetuar mua. Kjo, për mua, është një gjë shumë e rëndë. Jo sepse kam frikë nga SPAK-u – unë nuk jam subjekt i SPAK – por sepse po bëjnë presion ndaj SPAK-ut, sikur Partia Demokratike duhet të mbrojë SPAK-un nga Carlo Bollino. Kjo është qesharake nga pikëpamja njerëzore, por shumë e rëndë nga pikëpamja politike.
Ata akuzojnë të tjerët për presion mbi drejtësinë, por në fakt janë të parët që e ushtrojnë atë për të arritur qëllime politike. E kanë kthyer në traditë: akuzojnë të tjerët për veprat që i bëjnë vetë. Mendojnë se çdo qëndrim që ka një gazetar fshihet pas interesave apo parave. Unë mendoj se gazetarët e përmendur në përgjime kanë vepruar në gjendje të lirë: një gazetar mund të ketë bindjen që një politikan është burgosur padrejtësisht, një tjetër mund të mendojë që është fajtor – dhe brenda kësaj lirie, çdo gazetar ka të drejtë të shprehë mendimin e tij.”
Bollino thekson se SPAK duhet të hetojë se si kanë dalë këto përgjime në media, dhe pse janë publikuar vetëm në media të opozitës, ndërkohë që asnjë gazetë tjetër nuk i ka siguruar ato.
Ai sqaron se nuk është kundër publikimit të dokumenteve që janë pjesë e një hetimi sekret, por shton se SPAK duhet të ketë një standard të njëjtë për të gjithë.
“Kur SPAK ka kërkuar që të mos publikohen dosje që përbëjnë sekret hetimor, kjo kërkesë është respektuar. Por nga ana tjetër, nuk kuptohet përse në raste të caktuara shkelja pranohet dhe nuk ndëshkohet.” – përfundon gazetari Carlo Bollino.
Komente
