Trajneri i Qarabag, Qurban Qurbanov, ka folur sot për mediat para takimit të kthimit për turin e parë eliminator të Champions League kundër Partizanit.
- A do e eleminojë Qarabag kampionen e Shqipërisë?
“Rivali ynë është shumë serioz dhe i disiplinuar. Mbrohen mirë dhe me agresivitet, dhe kjo na hapi punë në ndeshjen e parë. Partizani kundërsulmon rrezikshëm. Nga deklaratat e kundërshtarit, ata janë gati të fitojnë dhe të kalojnë në raundin tjetër. Do jetë ndeshje e fortë, por do provojmë të luajmë me mendjen e kthjellët. Do kërkojmë të kënaqim tifozët me një ndeshje të mirë.”
- Do ndikojë eksperienca në Europë e Qarabag në ndeshjen e kthimit përballë Partizanit?
“Po, ne kemi përvojë në Europë, në një farë mënyrë kjo bën avantazh. Sidoqoftë, jam i shqetësuar kur arrin suksesin, dhe vjen një kohë që ka edhe dështime. Por, përvoja duhet të na ndihmojë.”
- Fakti që Qarabag luan ndeshjen e kthimit në shtëpi do ndikojë në lojë dhe rezultat?
“Mund të flitet gjatë për këtë temë. Por, nuk dua që të jetë diçka kryesore çështja e stadiumit. Ndoshta mund të ketë pak efekt negativ, por sidoqoftë, jemi para tifozëve tanë. Tifozët dhe futbollistët duhet të përgatiten për ndeshjen.”
- Po nëse 90 minuta nuk mjaftojnë dhe ndeshja shkon me penallti?
“Në ture me ndeshje kthimi, edhe penalltitë janë pjesë e lojës. Të dyja skuadrat duhet të jenë të përgatitura për këtë. Por, nuk po i vë në presion lojtarët. Përkundrazi, e kuptoj shumë mirë rëndësinë e ndeshjes. Nuk mendoj se është mirë të mendohet që pa nisur ndeshja për penalltitë.”
Komente
