Sulmuesi i kombëtares argjentinase, Angel di Maria është kërcënuar pasi deklaroi se do rikthehet në vendlindje për të mbyllur karrierën me klubin e Rosarios. Mediat në Argjentinë thonë se një makinë la një shënim para shtëpisë së Di Marias ku aktualisht jetojnë familjarët e tij.
Në të i sugjerohej Di Marias të mos kthehej në Rosario pasi në të kundërt do vrisnin një familjar të tij.“Ne nuk lëmë shënime letre. Ne lëmë plumba dhe njerëz të vdekur pas”, thuhet në mesazhin kërcënues.
Rosario, vendi i një prej qendrave agro-portuale më të mëdha në botë, së fundmi ka pasur një rritje intensive të dhunës nga grupet e trafikut të drogës pasi qyteti shërben si një nyje për trafikun e drogës nga vende të tjera. Vitin e kaluar, i njëjti kërcënim iu bë edhe Lionel Messit.
"Ky lloj kërcënimi sjell shumë trazira sociale dhe ky është qëllimi i tyre, të frikësojnë popullatën, të godasin figurat publike", tha Esteban Santantino, i cili punon për qeverinë lokale.
