DURRËS- Janë liruar nga qelia Nazmi Selmani dhe nipi i tij Petrit Selmani të cilët u arrestuan për kërcënimin ndaj kreut të FSHF-së Armand Duka. Nazmi Selmani president i klubit Iliria, njëkohësisht biznesmen dhe nipi i tij Petriti ishin të vetmit që vijonin të qëndronin në burg për kërcënimin ndaj Dukës, ndërkohë që djemtë e tij dhe Redian Loci, u liruan në seancën paraprake.
Gjyqtari Paulin Cera ka vendosur ditën e sotme masën ‘detyrim paraqitje’ për Nasmi Selmanin dhe nipin e tij Petritin. Nazmi Selmani kërcënoi dhe i bëri presion Presidentit të FSHF-së Armand Duka, duke i kërkuar me insistim t’i marrë të birin në Kombëtare.
Selmani u arrestua në Durrës mbrëmjen e 30 gushtit pas denoncimit të Presidentit të FSHF-së, Armand Duka. Sipas këtij të fundit Selmani i ka shkuar pranë banesës bashkë me djemtë e tij futbollistë, Adolfin, Brajanin dhe Santiagon, si edhe me Petrit Selmanin dhe Redian Locin, duke e kërcënuar. Nazmi Selmani deklaroi në polici se Dukën e ka mik dhe e ka kërcënuar në gjaknxehtësi e sipër.
Shkak për konfliktin mes tyre ishte bërë mos grumbullimi i Gentian Selmanit në Kombëtare. 26-vjeçari aktualisht është portier i KF Tiranës në Superligë ka qenë pjesë e Kombëtares A dhe ka luajtur katër takime, ndërsa nuk u grumbullua nga Sylvinho për ndeshjet kundër Ukrainës dhe Gjeorgjisë në Nations League (7 dhe 10 shtator 2024).
