TIRANE-Shtyhet mbledhja e Këshillit të Lartë të Drejtësisë. Paraditen e sotme është mbledhur KLD, por si pasojë e mos plotësimit të kuorumit është shtyrë. Në mbledhje ishin; Presidenti Meta, Petrit Çomo, Gerd Hoxha, Bruna Kadi dhe Eneida Civici, ndërsa anëtarët e tjerë jo. Report Tv mëson se në rendin e ditës ishin disa çështje, që pritej të sillnin debat. Në pikën e parë ishte kërkesa e Ministrisë së Drejtësisë për shkarkimin nga detyra të gjyqtarit të Administratives në Shkodër, Ahmet Jangulli.
Pika që parashikohej të sillte debat ishte ajo mbi raportin e Inspektoratit mbi gjendjen e gjykatave në Shqipëri. Numri i gjyqtarëve është i reduktuar në disa gjykate, për shkak të shkarkimeve nga Vettingu dhe largimet. Gjykata e Kavajës dhe e Lushnjes kanë më pak se 5 gjyqtarë. Raporti i Inspektoratit pritej të nxirrte në pah realitetin.
Ndërsa një tjetër pikë që ishte pjesë e rendit të ditës ishte kërkesa e magjistratëve për emërim. Kujtojmë që në mbledhjen e pak javëve më parë pati mjaft debate në KLD, pasi u rrëzua kërkesa e Ministres së Drejtësisë për shkarkimin e tre gjyqtarëve. Tashmë pritet të vendoset se kur do të bëhet mbledhja e ardhshme.