Avokatët e Berishës depozitojnë në Gjykatën e Posaçme kërkesën për përjashtimin e gjyqtares Irena Gjoka nga hetimet paraprake.
Avokatët kanë paraqitur si pretendim vendimin e gjykatës administrative të Athinës. Në seancën e 14 majit ata i kërkuan gjyqtares të hiqte dorë vullnetarisht nga çështja duke i paraqitur vendimin e Gjykatës së Athinës. Vetë gjyqtarja nuk u shpreh por i ktheu aktet avokatëve.
Ndërkohë seanca e radhës ku gjyqtarja do të shprehet për revokimin e masave të sigurisë për Malltezin dhe Berishën është lënë në 21 maj. Nga ana e tyre prokurorët e SPAK kanë kërkuar që të mos ndryshohet masa e sigurisë.
Prej 30 dhjetorit 2023 Sali Berisha ndodhet në arrest shtëpie, masë e caktuar nga Gjykata e Posaçme, pas kërkesës së SPAK.
Ish kryeministri Berisha, nën hetim nga SPAK akuzohet se ka ndërmarrë veprime konkrete në miratim ligjesh dhe aktesh nënligjore, për të favorizuar dhëndrin e tij Jamarbër Malltezi, një ndër pronarët e truallit ku shtrihej kompleksi sportiv, mbi të cilin ndërtoi më pas 19 kulla.
